Bolle de savon/Da-o monumento de Mazzin

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Da-o monumento de Mazzin
[p. 58 modifica]
Da-o monumento de Mazzín
Facit indignatio versum

I.

De ste neûtte passae, da-o monumento
de Mazzin, passaggiando alluveghïo
pe i tanti brûtti faeti - ch'ei capïo
za tûtti sensa che ve-i digghe - sento

(sento o me pâ?) co-e raffeghe do vento
che investe e scrolla i èrboi che gh'é in gïo,
comme ûnn-a voxe ammagonâ, sospïo
d'ommo ch'ha ûn dô de chêu: - mi da-o spavento

me fermo in sce duî pê: - tra e rovee e i pin
veddo, (o straveddo?) a-o ciaeo da lûnn-a pinn-a,
dä sò colonna vegnî zù Mazzin,

vegnî in taera d'asbrio: - perdingolinn-a,
(me pâ c'o sbragge) razza de Cain,
dunque, m'ei misso chì, proprio ä berlinn-a?

[p. 59 modifica]
II.

M'ei misso chì, m'ei misso chì, marmaggia,
comme fà d'ûnn'insegna o bûttegâ,
e i vostri voti en voti da majnâ,
e i vostri evviva! son fêugo de paggia?

Finimmola! ghe n'eì troppe in sciä taggia;
ghe vêu pe-i drappi sporchi ûnn-a bûgâ....
ma tûtta l'aegua no bastiae do mâ
pe fâ netta e ingianchî questa canaggia.

Sciù! finimmola; anchêu, presto: - doman
sae troppo tardi: - o popolo o l'é bon,
sto mae popolo forte, bello e san;

ma o vêu che i Giudda seggian, - con raxon -
brûxae c'ûnn-a camixa de catran,
e sciacchae comme a vipera e o scorpion -

1916.