Bolle de savon/In memoja de Luigi Montaldo

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
In memoja de Luigi Montaldo
www.liberliber.it 2011
[p. 20 modifica]
In memoja de Luigi Montaldo

Ûn nomme; ma sto nomme
o manda ûn bon odô
chi no dà ä testa, comme
l'é quello d'ûnn-a sciô
de viovetta, - e mi o ligo,
sto nomme, con de ramme
de çipresso o mortin
con vivo affetto antigo;
e ti, amicizia, damme
a mëgio de cansoin.

Luigi Montaldo, vëa
figûa zeneize! scrita
t'aivi a bontae in sciä cëa:
tò stradda, a stradda drita,
larga, assoigiâ, battûa
da-i pochi boin che a faccia
a tûtti pêuan mostrâ....
scimpatica figûa,
zeneize sensa maccia,
sccetto, averto - nostrâ!

[p. 21 modifica]

Ti no fävi fracasso,
e ti no fävi a rêua;
ti andavi do to passo,
ti no vegnivi fêua
a fäte vedde in scena
comme l'é anchêu o costûmme
de tanti burattin;
ti voeivi ben a Zena,
t'ei rosto sensa fûmme,
modesto çittadin.

Quanti che son sens'äe
fan comme o strûsso anchêu!
quanti che son çigäe
passan pe roscignêu!
Dixe o proverbio: - o mondo
o l'é de chi se-o piggia,
de quelli che san fâ;
sta a galla e no và a-o fondo,
l'é o primmo da famiggia
chi sà fäse avvoxâ. -

Ti che t'aveivi drento
all'anima e a-o çervello
inzegno e sentimento,
e in man o remescello;
ti che ti poeîvi a teja
tesce con fî de saea,

[p. 22 modifica]

e fâ o ciù bello lin;
ti che t'aveivi a veja,
ti no fävi bombaea,
ti te fävi piccin.

Solo ûnn-a votta, quande
s'é faeto o çentanâ
de quello nostro Grande
chi n'ha daeto o scigoâ,
da mëzo a-e feugge, comme
ûn roscignêu innamuôu,
solo per quello nomme
ti t'ë despascionôu.[1]

Canson faeta de lagrime,
de memoje e d'amô,
canson che t'ë dall'anima
spuntâ comme ûnn-a sciô;
magon, sospïo, lamento
che a-o giorno se conven,
vanni portâ da-o vento,
pösite in sce Staggen!...

  1. Si vuole ricordare la bellissima musica della cantata «Mazzi­ni» scritta, con intelletto d'amore, da Luigi Montaldo quando Ge­nova commemorò degnamente il centenario mazziniano. -