Bolle de savon/Da Portoia a Trento e Trieste

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Da Portoia a Trento e Trieste
[p. 126 modifica]
Da Portoia a Trento e Trieste

Quello giorno, che gran caeto!
Son zà squaexi duxent'anni
che, chì a Zena, se gh'é daeto
a sti çeotti d'Alemanni,
comme dî? - o riso co-a natta:
Voeivan, dentro ä nostra xatta
mangiâ o nostro menestron:

se pensavan, sti bonaegia,
de fâ i conti senza l'oste
ma gh'ëa scrito: - quaexi paegia!...
Zena e brûtte facce toste
a sà mèttile a cadello
con ûn sascio, cö cannello,
e servîle in to rognon.

Segge mille e mille votte
quello sascio benedetto:
ne creddeivan chen da botte,
ne creddeivan mû da zetto;
ma ûn bardascia tûtto feugo
gh'allivella a tempo e lêugo
ûnn-a paola e ûnn-a sasciâ.

[p. 127 modifica]

Sti bardascia gh'en a Zena
sempre: - anchêu comme in allöa:
cangia orchestra, cangia scena,
ma se ven o quarto d'öa
scciancan tûtto, fren e brille:
do sciûscianta son co-i «Mille»,
son co -i «Mille» in mëzo a-o mâ.

Anchêu poi son sciù pe-i monti,
sciù pe-i bricchi in mëzo a-o zëo:
sempre bûlli, allegri, pronti;
nervi doggi e animo fëo,
noxe becche con de scorse
dûe che dan do fî da torse
a-i tedeschi inveninae.

Sti Balilla n'en mai stanchi:
han piggiôu l'impreiza a scarso?
Comme foîssan chì pe Banchi
stan lasciù, in ta neive, a-o Carso,
perchè san che i-a[sic] accompagna
Zena, e che pe lö a s'allagna
con l'orgoglio d'ûnn-a moae.

1915