Bolle de savon/O sò ritraeto...
| ←Da Portoia a Trento e Trieste | Bolle de savon de O sò ritraeto... |
A taera promissa→ |
(vëgia memöja)
Ûn faccin bello, da spremme,
ûnn-a bocca da baxâ;
rêuze e laete mescciae insemme,
faete apposta pe innamoâ.
Eûggi neigri comme e muïe,
pin de feûgo, pin de vitta:
basta solo ch'a m'ammïe…
a l'é comme a calamitta.
Son due belle meje carle
e sò masche vellûtae;
basta solo ch'a me parle
perchè perde a libertae.
Matta, a no pêu stâ in ta pelle,
a l'é ûn pestûmmin savoïo;
basta solo ch'a parpelle
e... son chêutto e preboggïo.
Ma ste rimme descûxïe
n'han de lûxe, n'han de cô...
Lê s'a parla, lê s'a rïe
a l'é bella comme o sô. -