Bolle de savon/In te feste de Pasqua
| ←Zêuggia grassa | Bolle de savon de In te feste de Pasqua |
Da Portoia a Trento e Trieste→ |
(ai sordatti zeneixi)
Mûza zeneize, vestite dä festa,
ciappa a chitära e mèttite a sûnnâ:
se quarchedûn ven fêua co-a mëza sesta
dagghe dell'äja e màndilo a spigoâ;
e sensa temme fanni o to cammin,
mûza zeneize do pescôu Ballin.
Gh'é pë stradde ûn odô de primmaveja
ch'o recuvea, o fa ben, o l'impe o chêu;
gh'é ûn sciammo de scignöe zù pe Sozeja,
ûn sciammo de gardette e de figgiêu;
ma tûtti pensan: s'avvixinn-a l'öa,
e o sà Cadorna dove o diao o l'ha a cöa.
Mûza zeneize, porta o cavagnetto
a-i sordatti che son lazzù in trincëa,
dagghe di baxi, piggili a braççetto,
fagghe chêu, fagghe festa e fagghe cëa:
ti veddiae che a-o toccâ çerti cantin
ballan tûtti con ti o perigordin.
E digghe: - se no porto a çimma pinn-a,
porto i salûi da nostra bella Zena:
finiâ, zoenotti, (semmo zà in sciä zinn-a)
questo balla ghidon ghidon ghidena:
a man pe tûtti intanto mi ve porzo:
sbraggiae tûtti con mi: viva san Zorzo!
St'ätr'anno, a Pasqua, quande in sce San Giûsto
ghe sä a nostra bandëa.... Scialla, figgiêu!...
sä bello andâ pe-i monti, e sä ûn gran gûsto
o çercâ abbaje, mòrtani e praelêu,
assoîggiâse in scë prïe comme fa e grigoe,
e andâ, cantando, in Cianderlin pe scigoe.
1917