Bolle de savon/Carlo Malinverni a Goffredo Palazzi
| ←Goffredo Palazzi a Carlo Malinverni | Bolle de savon de Carlo Malinverni a Goffredo Palazzi |
Fanfaronata→ |
Quande se dixe nasce fortûnae!...
quelli quattorze versci rûzzenenti
che ho scrïto in quinta e sprescia e tiôu co-i denti,
han faeto celo: - s'ho da dî a veitae
me tocco se ghe son: - ma, serv'assae
sentîse poco e ninte! a di momenti
l'ommo o se scorda i boîn proponimenti,
e o no dà çerte cöse pe dinae.
Sciâ m'ha bollitigôu con quello sò
sûnetto c'o me porta a i sette çê,
e mì, comme ûn bibbin, fasso glò glò.
A-e mosche, tûtti ö san, piaxe l'amê,
a-i vëi zeneixi piaxe o baxaicò,
a-o poeta o vanto da chi sà o mestê. -