Bolle de savon/Fanfaronata
| ←Carlo Malinverni a Goffredo Palazzi | Bolle de savon de Fanfaronata |
A gran voxe de Zena→ |
Trentûn dexembre: - baccere!
chí se deslengua comme a giassa a-o sô:
andemmo, - e sensa accorzise,
dove finimmo?... tûtti in bocca a-o lô.
Passan che pä imposcibile
ûn anno cöse o l'é? ûn bägio de gallo:
mi n'ho zà visto.... A-o pippero!
no vêuggio dîve quanti ne camallo.
Sci.... bonaegie! - pe mettime
a-i loi: - no vêuggio che m'andae a scöxî...
e poi, me piaxe illûdime,
däme da intende che l'é ancon d'arvî;
däme da intende, e creddilo,
che ancon me baste ûn chêu c'ûnna cabanna:
ma zà, pe vostra regola,
o poeta o l'ha sempre a çigaa in sciä canna;
o poeta d'ëse zoveno,
tegnîlo a mente, o no l'ha mai finïo,
o poeta scinn-a a l'ûrtimo
o sghêua in te nûvie e o tïa o sò barbacïo.
Dixe: - t'ë do milleximo
tale, dunque son tanti, amigo: - ö sò....
ma a madonnâ bonanima
a m' ha insegnôu: - vëgio chi mêue allò. -
Scinn-a che gh'é da lelloa,
da lelloa verde ch'a s'abbrassa all'ormo,
e a vigna a l'ha de lagrime,
e posso aveìne ûn gotto pin cö cormo,
me sento, perdiesantena!
zoeno comm'aegua e tûtto pin d'axillo,
e no gh'é barba d'ommo
che posse dîme: ti t'hae faeto pillo!
Trentûn dexembre: l'ûrtimo
dell'anno! - Tempo, mi no sento a camoa:
mi te ghe daggo o vattene
co-a bottiggia e o pirron, cö gotto e l'amoa.
Sciù! spalanchemmo o portego
e i barcoin a questi atri dozze meixi:
de cöse bonn-e careghi
vegnî pe mi, pe tûtti i mae zeneixi.
Ma doppo tanta ciacciara,
a sto derrûo do tempo arrûffo e naixe....
vegniâ che diàn: finiscila!
e andiö a sentî cantâ mi ascì e bûgaixe. -