Bolle de savon/Ata o bassa d'arvî l'é Pasqua
| ←Ûn zeneize do secolo passôu | Bolle de savon de Ata o bassa d'arvî l'é Pasqua |
Pippo Macaggi→ |
Sô d'arvî, sô che ti sciorti
fêua, da-o mâ de Portofin,
sô d'arvî, cöse ti porti
a-i zeneixi stamattin?
Ti n'alleiti co-e promisse?
de speransa ti dae ûn fî?
No saan miga peje nisse,
sô d'arvî?
Ata o bassa, con ti arriva
Pasqua, bella festa scioïa,
che a ne porze a ramma d'oiva
e a ne canta l'allelûïa:
giardin, boschi, monti, ciann-e
pe ingiarmâse a gara van;
e battaggian e campann-e...
din, don, dan.
Spunta a rêuza in sciä sò spinn-a
e a fà o sûccao pe l'amê,
ha ûn odô de viovettinn-a
ogni passo, ogni sentê;
han i oxelli ûnn-a romansa
e ûnn-a scigoa han i figgiêu;
ommi e donne ûnn-a speransa
in to chêu.
Pasqua, parline de paxe,
Pasqua, insegnine l'amô,
fà che l'odio o scente, o taxe,
e o deslengue, - giassa a-o sô.
Moîmmo tûtti anchêu o doman,
tanto ricchi che imburae....
Paxe e amô; damme a tò man:
chì gh'é a mae. -