Bolle de savon/Ûn zeneize do secolo passôu

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Ûn zeneize do secolo passôu
[p. 134 modifica]
Ûn zeneize do secolo passôu
O sciô Giacomo Falcon

a Umberto Villa


Berto, me pâ de veddilo: ûn vëgio vëo zeneize
taggiôu ä bonn-a: sensa fûmme, sensa preteize:

o stà a sò posto, (cösa che pochi anchêu san fâ)
e a sò bûttega a l'é comme ûn porto de mâ.

Là, derrê a-o banco, o peiza faenn-a, fidê, trenette,
e a tempo e lêugo o sà dî quattro barzelette.

De votte gh'é, che o-e dixe finn-a ûn pittin granïe,
provocando in te donne çerti sccioppoîn de rïe....

A mattin, de bonn'öa, o l'arve o sò negozio,
e a-o telonio: o no l'ha da dâ conto dell'ozio;

ma da ûnn-a lûxe all'ätra lê o doggia o fî da schenn-a,
e o no se mette, comme i êuve marse, in dozzenn-a:

ûn brav'ommo, ûnn-a perla d'ommo, ûn galantommasso
pe dila in t'ûnn-a paola, proprio çernûo in to masso.

[p. 135 modifica]



O vive in te sò strasse, co-i figgiêu, co-a Manena,
ninte ghe pâ che segge ciù bello da sò Zena.

O veddo ä festa in gïo cö sò domenegâ,
pë mûage, pe-i caroggi zù pe-o Bezagno e Arbâ:

o l'ammia tûtto, o notta, o critica, o l'apprêuva,
o barchî, o giardin, o teatro, a ciassa nêuva:

gioso da sò çittae ciû che de sò moggê,
o ne fà o panegirico con zeneixi e foestê. -

Ûn giorno, do dixiêutto, mentre o se göde a scena,
dä punta do mêu vëgio, do porto e da sò Zena,

(barcajêu co-o berretto de lann-a, gossi, veje,
e lunxi Portofin, ciù lunxi o cäo de Meje,

sconn-e, ciatte, tartann-e, mainae, mossi che van
sciù pë corde, e l'odô de maen e de catran)

ben, quello giorno, o vedde all'amâ, tûtt'assemme,
ûn barco chi camminn-a sensa veje nì remme.

O no sà manco lê cöse pensâ, e o n'ha torto:
intanto o bastimento trionfante o l'intra in porto.

Da-i barcoîn, da-e terrasse, da-i lûxernae, da-e tôre,
ûn invexendo, ûn sciato: - boâ!... bello!... o l'é o vapore!..

[p. 136 modifica]



A vedde chì o sciô Giacomo, in mëzo a-o ramaddan
salûtâ cö capello, cö mandillo, co-a man!

a veddilo, a sentîlo, co-a sò famiggia ä seja
dî da nave miracolo chi cöre sensa veja!

E doppo çenn-a, quande no gh'é nisciûn ciù a mêzo,
perchè moggê e figgiêu son tûtti andaeti a vëzo,

cö taccuin de memoie, a-o ciaeo d'ûnn-a lûmëa,
co-a penna, e cädo ancon do giorno, aççeizo in cëa,

a veddilo o sciô Giacomo scrive d'asbrïo o commento,
o pe dï mëgio, a cronaca do nêuvo avvenimento!

Quella votta, de çerto, che Giacomo Falcon,
se ninte ninte o l'ëa co-e mûze in relazion,

co-a fantaxia chi bugge, chi säta, chi camminn-a
o dava scacco matto, ghe zêugo, a-o sciô Reginn-a. -

Lezzendo in to tò libbro, Villa, de sto zeneize,
taggiôu ä bonn-a, sensa fûmme, sensa preteize,

pensando a-i tempi quande fävan i nostri poae,
travaggiando in sciö serio, de coffe de dinae,

e ghe paeìva - bonaegie! - de toccâ o çê cö dïo
vantando di diritti doppo o dovei compïo,

[p. 137 modifica]



ho vosciûo fäne, forse con troppo presûmî,
e pe de ciù mandâtelo, sto schisso, e sto profî....

Sciollo! che me scordavo quello che san e prïe:
- nasce, apportoîndo o monte, ûn rattin chi fà rïe. -


Ho nella mia modesta libreria un curioso manoscritto: Le Memorie di Giacomo Falcone, che visse nella prima metà dello scor­so secolo, ascritto all'arte dei vermicellai. Il buon artigiano annotò in forma semplice gli avvenimenti che dal 1800 al 1840 maggior­mente colpirono il suo spirito d'osservazione. - Fermò la mia at­tenzione una nota che porta il titolo: Arrivo della prima nave a vapore. - Trascrivo la nota: nel mese di ottobre di quest'anno (1818) giunse nel nostro porto una nave a vapore, appartenente alla marina reale di Napoli. Tutti andavano a vedere una così straordinaria invenzione e ne rimasero meravigliati. -

UMBERTO VILLA - La Celebrazione del primo
piroscafo nel Mediterraneo. -