Bolle de savon/A bûgatta de Ninì
| ←A taera promissa | Bolle de savon de A bûgatta de Ninì |
Ûn zeneize do secolo passôu→ |
Vorriae dîghe, sciâ Marinn-a,
tûtto quello che ho in to chêu...
ma sciâ sà che son piccinn-a,
che son proprio ûn vëo pettêu.
Quande ho visto a mae bûgatta
coscì bella e ben montâ,
sciâ se credde? - paeivo matta,
no saveivo dove stâ. -
A pâ proprio ûnn-a scignöa,
no ghe manca che a parolla...
ciù l'ammio, ciù a m'innamöa,
parlo e rïo comme ûnn-a sciolla.
Tûtto o giorno ä piggio, ä pöso,
no sò cöse mi me fasse;
l'ammallocco, ä tegno in scöso
e l'ingiarmo con de gasse:
e ghe diggo: - pupponinn-a
ti ë caezonn-a da mamà -
poi, l'accoêgo în ta sò chinn-a
e ghe fasso fà a nanà. -
Sò che devo ringraziala,
sciâ Marinn-a,... eh! çerto... scì…
ma tanti êuggi... ma sta sala...
tanti ciaei... povia Ninì!
Oh! sciâ sà mi cöse fasso
pe sciortîne a moddo? - Taxo:
ma ghe daggo ûn bell'abbrasso
e ghe ciocco ûn bello baxo. -