Bolle de savon/Ûn figgiêu o l'é comme ûnn-a sciô
| ←Campan-e de Pasqua | Bolle de savon de Ûn figgiêu o l'é comme ûnn-a sciô |
San Silvestro→ |
Prescidente dell'Asilo infantile
de Borgo Pilla.
Cöse gh'é de ciù bello, de ciù cäo d'ûnn-a sciô?
L'impe a rozâ de gosse ch'en perle, ä baxa o sô.
O giglio, cosci gianco! - da mette in sce l'artâ,
sciô de çettron da fäne coronn-a pe-a sposâ,
o ganêuffano rosso pin de lê, pin de sciamme,
e çento e mille scioette che spuntan in scë ramme;
a viovetta modesta, quæxi ascosa in te l'erba,
e in sciö sò costo a rêuza comme in trono - sûperba.
Chi ghe passa vixin, ommo o donna, l'ödôa;
o zovenotto o-a piggia pe porzila ä scignôa:
ghe parpella in scë fêugge a farfalletta; l'ava
a vêu l'amê; - l'Ariosto ghe dedica ûnn'ottava. -
Cöse gh'é de ciù bello sotto ä cappa do çê?
Ma ghe stà giorno e nêutte d'attorno o giardinê.
Anchêu o-a mette a redosso se sciûscia a tramontann-a,
o-a mette, se gh'é o zêo, doman sotto ä campann-a:
gh'é a gatta chi ä roziggia? - fïto fïto o l'ammassa,
e o ghe leva d'adosso pighêuggio agno e lûmassa.
Lê a cresce a vista d'êuggio bella che a l'innamôa,...
ma sensa o giardinê presto a l'andiæ in malôa.
E ûn figgiêu cöse o l'é? - O n'é forse ûnn-a sciô,
sciô da casa, ch'o vive de cûe de frasche e amô?
Guai, se o se lascia solo, se o giardinê amoroso
no ghe stà apprêuvo! O fiore o diventa... ûn battoso.
Attenti! se se lascia ch'o piggie e stradde storte,
che a lûxe de quelli êuggi coscì belli a s'ammorte,
che quelle bocche fæte pe-i baxi, quelle gemme,
diggan de paole brûtte, diggan de gren giastemme,
a sciô a perde o profûmmo... no basta, se gh'azzunze
che a secca, a crêuva e resta solo o spinon chi punze. -
Ûn figgiêu! - Gh'é quarcosa de ciù prezioso a-o mondo
d'ûn pûtto, d'ûn bamboccio, d'ûn bello risso biondo?
Presente che innamôa, promissa pe o futûro,
anchêu cianta chi scioîsce, doman frûto matûro;
anchêu nostro demoelo, sciô do nostro giardin,
lavoratô doman; onesto çittadin,
che cö stûdio e l'inzegno, co-i muscoli d'äsâ,
cö martello, co a sappa, in porto, in tæra, in mâ
o fä sci che l'Italia, doppo sto gran scrollon,
a segge veramente forte e grande nazion. -
Vasta mente, êuggio d'aquila, chêu grande d'italian,
Mazzin, esule a Londra, o piggiava pe man
i figgiêu dell'Italia despèrsci pe-a çittæ,
e o ghe dîva: sö o vostro meistro, sö o vostro poæ:
e a lö in te ûnn-a stanziëta streita lûvega vêua
con quanto amô, con quanta pascion o fava schêua!
e o veddeiva in sciä spinn-a, a poco a poco a sciô
(pe lê che premio!) arvise sotto ä lûxe do sô.
Scignôe, scignori! in queste nostre sale ghe ven
tûtti i figgiêu da Pilla, tûtti i figgiêu foxen:
son i figgi do popolo, tutta roba nostrâ,
fiori da nostra tæra, fiori do nostro mâ.
In questo Asilo imparan da vitta o scopo e o fin,
veddan a stradda meistra pe-a quæ fäjan cammin,
conoscian che se son zeneìxolli e foxen,
son sorvatûtto - anchêu, doman, sempre - italien.
Chì son a sosto comme i fiori in te ûnn-a særa;
vermi, gatte, lûmasse no pêuan chì fâghe guæra…..
Ma se ûnn-a man no demmo tûtti a ste primme schêue,
povei nostri figgiêu, povie nostre figgiêue!...