Bolle de savon/Campan-e de Pasqua
| ←A rogna a l'é in te crave | Bolle de savon de Campan-e de Pasqua |
Ûn figgiêu o l'é comme ûnn-a sciô→ |
Ûn son de campann-e
vixinn-e, lontann-e,
da tûtte e collin-e,
da tûtti i sestê...
e spunta l'erbetta
chì e là, pe-i sentê;
ghe sà de viovetta,
de rêuze - pë crêuze,
pë ville e i giardin:
in scï terrapin
se balla, se cöre,
se rïe, se discöre
co-a bionda, co-a brunn-a,
se çerca o trifêuggio
chi porta fortûnn-a,
se sciacca dell'êuggio,
s'allunga ûn pö a man:
o tempo o l'é san,
o fà vegnî famme;
se çerca ûnn-a bèttoa
coverta de ramme;
a pàssoa ciarlèttoa
a dà o benvegnûo:
se mangia a derrûo
o pan e salamme,
a torta, a frïtâ,
e l'ûrtimo o pä
o mëgio boccon.
O tempo o l'é bon,
l'ajetta sottî
e limpido o çê:
zà in vista gh'é arvî:
ti vegni con lê,
co-a mæxima vèja
ti ascì primmaveja.
E o son de campann-e
vixinn-e, lontann-e,
intanto che scrivo
me dixe o tò arrivo....