Çittara zeneize/Rimme de diversi a ro Cavallo e risposte de esso/Sciù ri ormi, sciù ri pin, ò sciù re noxe

←Do Baldan e Risposta

Çittara zeneize - Rimme de diversci a-o Cavallo e risposte de esso Do Bogian e Risposta

Do Scciafin [e Risposta]→

Zena, Franchello, 1745
notte do Prien

Del Signor Francesco Boggiano al Cavalli. Sciù ri ormi, sciù ri pin, ò sciù re noxe Çillâ no s’ode un’óxellin ciarlê; E ro Bezagno, ch’era zà a ra Foxe, Per sepellîse in Mâ, torna a derrê: Tutto in sentî Ballin, chi porta in Çê Ra sò Maxiña con sì dôçe voxe, Mentre cianzando o dixe, che per lê O porta sciù re spalle uña gran croxe. Oh biâ ti, Maxiña! ti sarǽ In secolo dri secoli onorâ Per ogni borgo, e in tutte re Çittǽ: Perchè ti sarǽ vista cavarcâ Un Cavallo sì bon, da no poei moǽ Avançâro ro tempo in caminâ.

Del Cavalli Al Signor Francesco Boggiano. Boggian, vâ poco che sotto ra Noxe Faççe Amô con incanti ro ciarlê, Ò ch’o scorre Maxiña pe ra Foxe, Per fâra in ver Ballin vóze adderrê: Che ra crua, missa sciù ri sette Çê Da chi gh’ha perso aprœuo tosto ra voxe, Con formâse un Pareizo da per lê, A no dà ciù de griffi ni de croxe. Tanto che ra mæ Muza, chi sarǽ (Come aora l’è da Voî tanto onorâ) Per lê ciù che ben vista a ra Çittǽ, Vistase con strapaçço cavarcâ, A rompicollo aora per sempremoǽ A me lascia a ra liggia caminâ.