Çittara zeneize/Rimme de diversi a ro Cavallo e risposte de esso/Çerchæ tutta ra Darsena e ro Mœu

←Do Scciafin [e Risposta]

Çittara zeneize - Rimme de diversci a-o Cavallo e risposte de esso Do Levanto e Risposta

Do Giustignan e Risposta→

Zena, Franchello, 1745
notte do Prien

Del Signor Leonardo Levanto al Cavalli Çerchæ tutta ra Darsena e ro Mœu, Non troverei Pescao grande ò piccin, Chi posse accoventâse con Ballin, Ballin famozo da Lussabalœu. Ma no sò che me dî dri fæti sœu: Aora o se perde aprœuo a gritte e zin, Dapœu che Amô ghe dà per so destin Uña gritta per donna, un zin per cœu. Amô gh'è andæto a mette in fantaxia, Che quenti pesci son dent’ra mariña, No voæran questa gritta savoria. Ni ghe ponze ro cœu nisciuña spiña, Quanto ro ponze, ch'o no trœuve via D’incióde questa gritta a luña piña.

Del Cavalli Al Sig. Leonardo Levanto. Quella Gritta, dri pesci ro carzœu, Onde l’Arba destilla a ra mattin, Per savorîra, çuccaro divin, Amara per mi solo e dentro e fœu: Quello zin, tutto armao de pointeirœu, Chi me pertuzan, senç’avei moǽ fin: Quella Bella, chi ha misso ogni sò fin In vive dra mæ morte, e moǽ no mœu: Ch’a m’agge misso in tanta frenexia D’abbandonâ per lê ra fregattiña, Lonardo, a che stupî dra mæ paççia? Se Amô, chi fa dro lesto e dro berliña, Ven per veira d'in Çê senç’arbaxia, Là dond’a sta con maestæ diviña?