Ro Chittarrin/À ro sorprendente merito dra sig. Anna Pallarini

by Steva de Franchi

←À ra signora Lucreçia Aguiari in ra mæxima occaxion

Ro Chittarrin, o sæ strofoggi dra muza de Steva de Franchi À ro sorprendente merito dra sig. Anna Pallarini

Per ro semeggiantissimo retræto dro serenissimo Giambattista Cangiaxo→

À ro sorprendente merito dra Sig. Anna Pallarini, che con universale piaxei e stupô balla à ro Teatro de S. Agostin l'anno 1771. rappresentandose ri doi Drammi ro Re Pastô, e l'Eroe Cineize.
SONETTO.

Un leggiero ciummin sciû re rachette
Me pâ ra Pallarini, quando a balla.
A fa ri botti comme fà uña balla,
E intreçça in mille moddi re garrette.

Bello vei quelle ottave nette nette!
Comme ra natta lê stà sempre à galla:
Ro Perterra ghe gove, e se ghe scialla,
Massime quando a fà smorfie e graçiette.

Datili, Idei, Cureti, e Coribanti,
E quanti vanta l'universa terra
Ballarin a i dì nostri, e a quelli inanti,

Se ardissan mai de deciarâve guerra,
Con ra vostra bravura à tutti quanti
Voî ghe farei posâ ri arme â terra.