Rime diverse in lingua genovese/Se ben n'han luxe o Donna i oggi mè

Da Wikivivàgna
Sata a-a navegassion Sata a-a serchia
Rime diverse in lingua genovese de Beneito Schenon
Se ben n'han luxe o Donna i oggi mè
da-e Rime diverse in lingua genovese, Bartoli, Pavia, 1588
cangiòu e u in v e viçeversa; clicca i asterischi pe l'errata corrige
[p. 101 modifica]
B. S.


Se ben n'han luxe o Donna i oggi mè,
Che troppo agro accidente l'amortà
Ni pon vei ri miracori che Dè
Tutto ro giorno, in questo mondo fà
Quella virtù, che cosi* larga in Cè
Ve dè natura, quando a ve formà
Tanta luxe me porze all'intelletto,
Che de vui posso vei ro ben perfetto.

2Perche de rero, un'annimo gentì
Per ornamento hà moe brutta figura,
E s'atramenti segue, o se pue di
Che quello sea deffetto de natura,
L'ascoso che da mi se fa senti*
Ro descoverto ha de mostramme cura,
Si che s'odo de voi l'ascoso ben
Veggo quello chi pà, ni chiù ni men.

[p. 102 modifica]


3Per questa via, mi chi son orbo, posso
Giudicà sannamente de corò
E di quando me fere, e luxe adosso
Dro vostro bello viso, ro sprendò
Che quanto è da ro pichieno, a ro grosso
E da ro chiù cattivo, a ro megiò
Tant'è de defferenza a quella luxe
Da l'atra chi ro giorno in terra aduxe.

4E ve crei che non sacchie monto ben
Che bella como vui Donna non vive,
E che tutto l'honò se ve conven
Che lengua possa dave, o penna scrive,
Che per vui soramenti Amò sosten
Ro regno, e da re vostre luxe vive'*
Piggia quella virtù con che da puoe
Tent'annime o l'accende, e tenti cuoe.

5O quanto me stupisso, e maraveggio
Quando ra mente drizzo, o Donna in vui,
E re bellezze vostre ben cerneggio
Chi ve fan cosi rera chi tra nui
A ra Lunna, a ro Sò nc* v'assemeggio
Che varei meggio assè de tutti doi,
Ma come è dritto, e raxoneive, a quella
Bellezza chi de lò ve fe chiù bella.

[p. 103 modifica]


6Da questo nasse annima mea che tenti
Annimi dexirosi han per costume,
De xvorà come oxelli tutti quenti
A ro vago sprendò dro vostro lume,
Donde arrivè tra quelli lampi ardenti
Con ra vitta meschin lassan re chiume
E fan quello nessou chi fà ra seira
Ra porcelletta intorno a ra candeira.

7E veramenti se chi troppo vuò
A ra spera dro Sò dritto mirà
De sorte o s'abbarlugha, che dapò
Ro gianco, noigro* a rà sò vista pà,
Ra vostra viva luxe ro me cuò
Chi può ro scuro inferno chiero fà
Chi ardisse oggio ben san de mirà chie
Orbo no restereiva como mie?

8Con l'annimo per zò netto, e purgao
Ogni corpo mortà v'honore, e inchinne,
S[']ò desira per vui fasse beao,
E vei cose dro Cè belle, e divinne.
A re què mi son zà tanto accostao
Anchora che attaston ro pè caminne,
Che veggo bello, e chiero ro Pareiso
Per quella via c'ho da vui Donna impreiso.

[p. 104 modifica]


9Veggo mirando in vui mille Angeretti
Unna bella rionda fà per ere
Che puoeran* tenti ricchi barassetti
Davanti a ra grandezza dro Dè Poere,
E cantando fra lò ri figgioretti
Unna musica fan con si doce ere
Che a poreiva allegrà quello che tenti
Agni, a ro mondo stè frà doggie, e stenti.

10Veggo tent'atre cose che a vorrei
Rasonave de quelle à compimento,
Sareiva de besogno à mè parei
Ch'atro no fesse moe* per agni cento
Ni poreiva a ra fin tanto savei
De zò che veggo de vui stella, e sento;
Che no fosse l'effetto assè chiù grande
De quanto poesse ra mè lengua spande.

11Basta che come in cè fra i atre luxe
Quella se vè dro Sò chiù viva, e bella,
Perche la sù no soramenti à luxe
Ma d'esto mondo, in questa parte e in quella,
Cosi* ra vostra vaga e chiera luxe
Chi sprendò dona a l'unna e l'atra stella
Prima, è fra queste basse come in cè
Tra re cose divinne, e primo Dè.

[p. 105 modifica]


12Ma perchè ro parlà de poco peiso
Che d'un soggetto così grande fasso
Porreiva annima cara de Pareiso
Tirave in quarche luoego scuro, e basso,
Meggio è che taxe, che da mi repreiso
Me tegne, per no vei che in un stromasso
Atri addotè ch'a mi de meggioi dote
Ro stì, ra penna, e ro papè ghe bote.

13Soramenti dirò può c'ha vossuo
Amò fave de mi libero don
E che per honorave anchon nassuo
E per amave, e per servive son,
No me voggie mostra* ro cuò si cruo
Da fame caze in terra a rubaton,
Anzi acette* ro me servixo in graou
Che posse fame in vui tutto beaou.