Ra cittara zeneize 1636/Zá per arví re træte
| ←torna a l'èndexo | Ra cittara zeneize de Amoî boscæsci |
Oura che manco asseizo→ |
| Zena, Gioxeppe Pavon, 1636 In corscivo e ligatue. |
Canzon Prima.
1.
Zá per arví re træte
Dro Dì l'Arba esce fuoera
Ch'oura, oura era in fassuoera
Con ra bocca ch'ancon ghe sá de læte,
Oh' che bella mattin,
Desciate Bella à veira con Perrin.
2.
Vegni, cara a vei rie
Ro Bosco e ra Montagna
A vei pe ra Campagna
Re scioi tutte de nuoevo revestie,
Vei brillà pe ri chien
In Vivagne d'Arinto ro terren.
3.
Rò gusto dra verdura
Oh' che gove perfetto,
Che vive per diletto,
Ro vive à beneficio de natura
Chì, d'onde gianco e brun
Ro Povero e ro Ricco son tutt'un.
4.
Chì chiungi de cervello
Fuzzan come ro sciento
Amó tutto contento
Straluxe pe re strasse d'un gonello
Con lumme chiù divin
Che in re Cittæ trà liste d'oro fin.
5.
Donca à tenti regalli
Cara Bella stà sciue.
Zà con colli de grue
Ro Dì chiamou per tutto è da ri Galli
Ri oxellin tutti à un ton
Fan per accompagnate ra canson.