Ra cittara zeneize 1636/Stanco da ro travaggio
| ←torna a l'èndexo | Ra cittara zeneize de Amoî boscæsci |
Sciù ro Carro d'arinto→ |
| Zena, Gioxeppe Pavon, 1636 In corscivo e ligatue. |
Canzon Tersa
1.
Stanco da ro travaggio
D’havei per longa pezza à ra soriggia
Roncou chiù d’unna Liggia
Destannou chiù d'un Baggio
E rotto à son de corpi de paferro
E sassi, e Rocche dure come ferro,
Misso come à partio
Da ro suo, da ro scioú
Mà chiù da Amó, chi moæ no ghe fà fio
Con gambe de battuo strangossioú
Sott'unna gran castagna
A ro pé dra montagna
Ranghezzando reduto in sciù ra fin
Così cantà l'innamorou Perrin.
2.
Oura che in ogni luoego,
Come ro Cè sæ quarche gran fornáxe
L’ære và tutta in bráxe
Ro Mondo è tutto un fuoego
Che ro Sò in lion per dì cosie
Menassa de schiappá fin a re prie
Che ogni oxellin confuzo
Sequestrou dentra tanna
No s’incalla trá becco da pertuzo
Chi sà se à ro tò solito villanna
Chiù che muoæ accagná
Lichinna è chiù ostina
Tì sola à tanto cado, à si gran passa
Ti nò sei con Perrin com'unna giassa?
3.
Perrin, che à ra reversa,
Quanto chiù tì con lé tì fè dra stria,
Chiù dell'incancaria,
Dra Maria reversa,
Lé sempre tanto chiù t’unze e te prega
Dentro sò cuoe t'hà tutta quanta intrega
Per tì reduto à segno
Che in veisero d'avanti
In primma vista ogniun l'hà per un legno
Come ti vei, arrivou tanto inanti,
Ch'ò fà cuinto drà stæ
Come ch’à nò ghe sæ
Com'à puinto avviou dentro l'inferno
Donde tanto è ra Stæ come l'Uverno.
4.
Manco má, Bella cara,
Se tente penne che patiscio à torto
Tente croxe, che porto,
Con daghe ti dell'ara,
Fuissan cose si nuoeve da poei dí
Lichinna é scuza à no re compatí,
Ma come che da ló
Sen cose in questa Valle
E chiù vege, e chiù chiære che ro Só
A tratene ra corpa da re spalle
Accordá tente muze
Atro ghe vuoé che scuze,
Che se ben ri Pastuoi ro taxeran
Ri sassi, à son de trombe, ro diran
5.
Ma per lasciá da parte
Ro dire ò nó dri sassi ò dri Pastuoi
Me cuoé chi trà de nuoi
In qua se voeggie parte
No gh'è ri spegi chiæri da mostrate
Quanto tì é torto à no dezinganate?
Considera me cuoé
Per oura l'union
Dra Grigora, dra Biscia, e dro Laguoé
De tenti atri Animæ senza raxon
Mirari in comarægo
Pe ro bosco sarvægo
Conversá pe ri Monti e pe ri Chien
Con paxe e caritæ da crestien.
6.
E se questo nò basta
Và mira in quenti muoei trà ra verdura
Con stupó dra Natura
E s'aggroppa, e s'incrasta
E s'arreixa, e s'abbrassa, e s'attortigna
A tronco, ó pá ra lelora, e ra vigna
Azzunzighe de chiué
Quelle son bestie vére,
Attosseghæ prima che sen nasciué
Queste son fore, erbaggi da maxere,
Prive d'intendimento;
Sensa conoscimento,
Pù per quanto sen bestie erbaggi, e fore
Nò han trà lò foeggia, ò pei chi nò s'adore.
7.
De chi dunca argumenta,
Lichinna, per vegní semme à ro puinto
Se Perrin se pá puinto
Se tanto, ò s'allamenta
Per vei tanto da ti perseguitase
S'ò l'hà raxon, ò nó de desperase
E se à ra fin movua
Da tenti paranguoin
Ti fuissi moæ per date per vensua
Per traro un dì da fate chiù passuoin
Faro primma ch'ò serre
Ri oeggi e ò se sotterre
Con díghe un bello si ò un bello noé
Perche unna cosa presta va per doe.