Ra cittara zeneize 1636/Rossignuoe
| ←torna a l'èndexo | Ra cittara zeneize de Rossignuoe |
Indie tra mi crio→ |
| Zena, Gioxeppe Pavon, 1636 In corscivo e ligatue. |
Canzon Quinta.
1.
Rossignuoé, che à son de chienti,
De lamenti
Ti pertuzi ra boscaggia,
Che gran raggia,
Che gran spinna
Te pertuza e t’assassinna?
2.
Ello Amó che per bonombra
Forsi all'ombra
Se trattegne sotte l'ara
Ra to cara?
O martello
Ch'à te dagghe d'atro oxello?
3.
Se l'è questo ro tò sdegno,
Semmo à segno
No te manca compagnia;
Girosia,
Come tie,
M’assassinna mi assie.
4.
Femmo dunca à ra foresta
Dro mà festa
Tra ri treppi d'este ramme;
Ognun chiamme
Ra sò Bella;
Ra batteze per rebella.
5.
E se à caso à nò responde;
S'à s'asconde
Carreghemoghe ri panni
Con maranni;
S'à se muoeve,
Ti ni mì, nò se descruoeve.
6.
E se missa all'accimento
Quarche chiento
Ghe notassimo ò sospiro,
Femmo un tiro,
Demmo un crio,
Con pagara d'un adio.