Ra cittara zeneize 1636/A cantá dro gran Duxe dra Cittæ

by Gian Giacomo Cavallo

←torna a l'èndexo

Ra cittara zeneize de Gian Giacomo Cavallo Do Peo Gioxeppe Giustignan

Sciù re spalle, Cavallo, ri cavelli→

Zena, Gioxeppe Pavon, 1636
In corscivo e ligatue. Gh'amanca i acenti aguççi.

DEL SIGNOR PIER GIUSEPPE GIUSTINIANO. A canta dro gran Duxe dra Cittæ Veggo ch'ogn'un se tira ra casetta, Cavallo caro ve ra diggo schietta, Mì n’hò Venna chi voære duoi dinæ. Apollo, ch'era zà comme me fræ Me rende amarespærme de berretta; Minerva, chi me fava ra Civetta Oura m'hà per un Cucco da sassæ. Vuoi ch'andæ in Pantofore, e in Sammarra In Parnazo, e l'avei per Bagatella; Accordæ pe ro Duxe ra Chitarra. Di che Gian Steva Doria è in Ce ra Stella Chi sà porta Baransa, e Cimmittarra, Così sarei sò Meistro de Capella.

RISPOSTA Gian Steva Doria hà tente qualitæ Che se puoe di, sens'atra banderetta, Che ghe serve ro nomme per trombetta Per esse reverio da chi se sæ; Mà come Duxe in ra sò Maestæ O pa, in veiro assettou con ra bacchetta L'Idea, ro retræto, e ra pandetta Dro pubrico decoro, e dignitæ. Qua Muza dunca sarà sì bizarra Da puei sta con quest'oro à ra copella, Ch'un minimo caratto nò ra sgarra? Ra mæ, chi ha sempremoæ quarche schenella Nò ve crei miga ch'a passe ra sbarra; Giustignan, se ghe n'è, ra vostra è quella.