Poexie zeneixi do Feliçe Santi/Voxe chi ven d'in Çê
| ←Al D.r Ardoino Cav. Vincenzo per onomastico | Poexie zeneixi de Voxe chi ven d'in Çê... |
Fêugge secche→ |
No, disperate, no, mæ câo Vinçenso,
Se t’hö lasciôu in sciâ tæra all’improvviso:
A mi me cianze o chêu se me gh’appenso,
Ma, m’ha ciammôu o Segnô d’in Paradiso.
Pensa che questa a lè a voentæ de Dio,
E dàtte paxe, câo, ciù che ti pêu;
Pensa che mi, d’in Çê, t’hö benedio
Insemme co-i mæ nevi... i to figgiêu!
Eppöi - ti sæ? - scibben che mi son mörta,
Manco ûn menûto solo t’hö lasciôu;
Te staggo dä vexin, te fasso scörta,
Comme t’hö sempre fæto pe-o passôu.
E quando ti domandi, da l’Artâ,
Quello conförto che o tö dô o reclamma,
Pensa che a fianco a ti, lì inzenoggiâ,
Gh’é ûnn-anima ch’a prega... Gh’é tö Mamma!
Al D.r Vincenzo Arduino.