Poexie do Gioxeppe Peagallo/Pe-a partensa de P
| ←Lamenti do Diao Zorzigan | Poexie de Pe-a partensa de P |
Brindixi→ |
PE-A PARTENSA DE P......
O cäi parenti, o mæ diletti amixi,
Ve devo ûnn'atra vòtta abbandonâ?
No son dunque finïe tutte e mæ crixi,
L'é stabilïo che degge tribolâ?
L'é dunque stabilïo che i mæ nemixi,
O amixi fäsi m'aggian da insûltâ?
L'é stabilïo che n'agge mai da gode,
E che l'anima e o chêu m'agge da rode?
Sæn maledetti i sàndali e o cappûsso,
Recco, Rapallo, Ciävai co-i broddæ
Paddre Ghigermo e Paddre Beneitûsso,
Fræ Zaccaja, Fræ Zane e i atri Fræ,
Chi é secco, con chi ha cuiga in to coppûsso,
Chi no sa ûnn'acca e chi sa leze assæ,
Ghe metto ascì chi me vêu mâ, chi ben,
I foestê co-i Zeneixi, i matti e i sen.
Ghe metto... Ma per bacco! ah cos'hò dito!
Malinconia, d'onde ti m'hæ portôu!
Meschin mi! poveo Fratte!... oimé! son frito!
Perdon, gente, perdon s'hò giastemmôu!
Se ne-i decretti do destin l'é scrito
Che mi degge ëse ancon perseguitôu,
Cose ghe deve intrâ Ciävai co-i Fratti,
I foestê co-i Zeneixi, i sen e i matti?
Nö merito, l'é vëo, ma ve domando
Perdon de mæ giastemme per caitæ:
M'accorzo che m'andava a testa giando
E che aveivo e idee meze imbroggiæ;
Perdonæme, o Zeneixi, e doppo quando
Vegnieì a fâ ûnn-a vixita a-i Broddæ,
Domandæ cose voeì, fö a vostro moddo,
Ve dö pan, pesci, ciccolata e broddo.
Ma oimé! o tempo o fa cammin,
Mezogiorno o l'é vixin,
E zà veddo o postiggion
Dâ recatto ä Diligensa,
Veddo là ûnn-a confûxion
Che pä proscima a partensa...
Aspëtæ che son chì mi,
O mæ posto o l'é de chì;
Monto sciù co-e braççe morte,
Vaddo via, cosci vêu a sorte
Sempre avversa a-i pövei Fratti!
Dæve pù i vostri recatti,
Arrangiæve postiggioin...
Ah se fasso za cammin...
Perdonæ, son mezo alluôu
Da ûnn-a scossa c'hò piggiôu;
Son zà chì a-e Porte da Pilla,
Zena, addio, che vaddo in villa.
Zena diletta,
Diletta Zena,
Son sempre a ûn atto,
A-a stessa scena
A fâ a figûa
Do burattin.
Ciävai m'aspëta,
E mi te lascio,
De ciù no diggo,
Perché me giascio
Tûtto in ti denti
O mæ venin.
Veddo che a mi propizia
Ese no vêu fortûnn-a
Sotto cattiva lûnn-a
Son stæto generôu;
L'é megio che me colle
Ste pilloe con paziensa;
Se fasso penitensa,
L'é segno c'hò peccôu.