Poesie drò Signò Giurian Rossi/Viaggio con tartanna
| ←scriti do Giurian Rosso | Viaggio con tartanna de |
| da-o manoscrito Ricci 177 do Comun de Zena, www.storiapatriagenova.it clicca in sci asterischi pe de verscioin alternative da i atri ms. da collession Ricci |
1
No Dame e Cavariè, no Arme e Amoì,
No Capitannij, de cantà me vanto,
Ma panzate e Frijtè de belli humoì,
Farinè senza crosta, houra ve canto.
Musa ti chi lassiasci dri vin meggioì
Va ra chiave in Parnaso porta intanto
Unna Zucca de doze, azò con quello
Possa bagnà e sunnà ro sigoriello.
2
Vuì sentirei de cinque desperè,
Leccarezzi dri Pesci de Tartanna
Che per purgà de marzo re pecchè,
S'imbarcan sciu unna scorsa de bazanna,
Gh'è Piero Verde, Nicolò Biellè,
Giacomo Arella, ro dottò Pedanna,
Messiè Giurian, Careghin sciaccarello
Antigamenti haveivan ciu servello.
3
Ri vintidoi de marzo a ra mattin
Dell'anno sieisento sinquantun,
Ro scio Giurian Piero nostro, c'haveivan fin
D'andà a rompì intri schoeggi ro zazun
Satà foera dro Giazzo a mattutin
Se m'attacca a ra Porta l'importun
Me fa satà sciu in sprescia, e voè ch'andemo
In so mallora a manezà ro remmo.
4
O che bella giornà de dozitè,
O che tempo schielente havemo ancoè
Ri Venti son intra Tanna intaffurè
Ro mà stanco mescià ciù non se poè
Andemmosene in Paxe e in caritè
A faserli un po chioeve sciù ro coè
Femmo Ginerca un pò foera de cà
E ogn'un porte con liè quello ch'o l'ha
5
Mi che son de natura compiaxeive
Per stà in giollito ancora e in pavarinna
De lasciame recrè resciorvo a beive
E andà donde ra stella me strascinna,
A senni* d'un Patron si meriteive
Fasso fà ra corbetta da Maittinna
Con quattro broccoletti apointo in vero
Manna per lubricà ro scio Gian Pero
6
Ro sciò Nicolo Raggio no s'appiella
De lasciase liè assì con nuì reddue
E nui veggando che ra bonna stella
Con un raggio begnigno ne condue,
Piggiemo ro Tian, Legne e Paella,*
Per coexe nuì ri Pesci e gustà chiue
Montemmo in Barca e l'oerio bello e bon
Ro porta ro sciò Giacomo Madon
7
Cosi cantando ognun ra Girometta
A penna semo a ra meitè dro corso
Che d'in Varenna là da ra Torretta
Vegnì veghemmo ro Dottò da Corso
Chiamemoro con nuì cancaxinetta
(Che o viegne) passo a balle ro descorso
Montoù ch'o fui a Piegi se n'andemo
E lì un rubbo de Pesci s'accattemmo
8
Arrivè a Castellazzo in quella cara
Parendone a proepoesito ro loego
Caremo e incomensando un piggia para
Chi lava, e chi infarinna, e chi fà foego
Chi mette l'oerio, chi ro Tondo appara
Chi fa ro Credenziè, chi fa dro coego
Ro sciò Gian Pero intanto un pò ciù in là
Per fuzì l'otio fava ra cacà
9
Friti ri Pesci infin là sciù ra Gera
S'accoreghemo, e poè de chi e de lì
Eviva, e mangia, e brindesi a bombera
Brindesi a unna Personna che so mi,
Brindexi, dixe un atro a quella Lera
Chi me fa fà ro coe schichiribì
Portè da beive attorno, e vin ancoè
Ra libertè, viva chi ben ghe voè.
10
O che Pescio ben coetto, e megio acconso
Sto vin sciò Nicolò ro coè me scampa
Barba Giurian fà in sà quello ramponso
Dottò Bibamus, però stemo in stampa
Sciò Giacomo scusè se ve desconso
Schiao Signori amorto questa lampa,
E ciorla, e viva, infin per bonna diccia,
Piggiamo tutti in concruxion Baciccia.
11
Così haggiando dapoè ben pin ro troeggio
E commensando Bacco a fà lavò
Veggo buttà doz'annie da ro scuoeggio
Vaggo in Barca a tiraghe mi lantò
Ma meschin mi a penna vozo l'oeggio
Ven zù sasciè da parte dro Segnò
Mi guardo se chioveiva, o se nevava
L'era un amigo miè chi me tirava.
12
Non se poè in fin trovà cosa nisciunna
Chiù bella d'unna alliegra Zoventura
Ma meschin mi, n'ho sempre ra fortunna
Con ro vento in favò, dri matti a cura*
Perche sotta ro concavo dra Lunna
Ro gusto in fin dell'Homo poco dura
Che doeggie a gusti, a gusti patimenti,
A ri canti sucede in fin ri chienti.
13
Ma nuì soli, a nuì soli quelli semmo
Che se demo dra zappa sciù ri piè
Che con chiu stemmo ben ro mà serchemo
Giusto como ri Mieghi e ri Barbiè
Perche no semmo in fin cose s'aggiemo
L'istessa Veritè ro dixe liè
E per toccà con man che l'è così
Accosteve Signori stè con mi.
14
Intro chiù bello infin dell'allegrezza,
Lasciusa in ato mà ro scio Gian Pero
Vè re Tartanne, e con ra so cadezza
D'andaseghe a sbiggià mostra pensiero
Ogn'un de seguità mostra prontezza,
Ghe n'era però duì, che a dì ro vero,
Sciù ro derrè per poei fuzì ra scuoera,
Tutti duì intro montà stavan de foera
15
Montemo in somma, e in doe cazzè de scotta
In poppa gh'arrivemo de galoppo
Ma in tro chiu bello ohimè piggia ra votta
Ra Roea dra fortunna no stè troppo
E n'intravegne a noì giusto sta votta
Com'occorse all'Aze là d'Isoppo
Che per no pensà gueri all'avegnì
De donde l'era introù non poè chiù uscì.
16
A penna semo destachè de là
Che ro vento de Terra incancario
Commensandone a dà noeva de Cà
Ne menazza de mette a mà partio
In cangio de tornà a terra andaimo in là
Fescimo veira con un cuoè abertio
Ma nò forza, dixan tutti anemo* via
Ch'investiremo forsi a Sant'Andria.
17
Ma delongo ingrosciando e vento e Mà
E caminando nuì chiu che de passo
Eccate un raffegon ven da meistrà
Che l'erboro ne stroescia d'ato a basso
Pensè vuì comme demo nuì restà
Per no poei chiù doeverà ro canavazzo
Senza veira restando li meschin
Comenzand'a chiamà sant'Antonin
18
Da quest'orrendo caxo innorridij
Da Poppa a proa perdendo ra parolla
Femo a moen zointe coetti e prebogij
Con ri Santi e con Dè ra gramignolla
No ve orei remescià porchi vestij
Dixeiva ro Patron montoù in bricolla
Piggia sta veia, molla quello cao
Battin, Maxin, Perin, voega Diao
19
Sciuscia in tanto ro vento, e nuì lantò
Veggando che ro merita ro caxo
Animè se poè dì da ro timò
Chi piggia in man ro Remo e chi l'oggiaxo*
E fra ri atri che voegan, ro Dottò
D'ogni remà fà nasce ro bombaxo*
Ri atri cosi là, ma ro Perou
A re quattro remè perdè ro sciou
20
Mi ch'havè misso per fà quinto bon
Un Campanin per mira ra Lanterna
Veggo che no se mescia esto Ponton
Si ben che ro Timon ben se governa
Veggando che ghe va ro pellizzon
Te gh'incommenz'a faghe uña fraterna
Perche se verso in fin no se ghe piggia
Nuì femmo in chinze giorni cinque miggia.
21
Figgi cari, ghe diggo, ro Segnò
Ra veira n'ha levoù, lascioù ro remo
Che ra morte no voè dro peccatò
Liè n'oè sarvà, ma o voè che s'agiuttemo,
Remescemose pù, femo vigò
Ma d'ese Homi da ben voto fassemo,
Che mi de chiù prometto de mandà
Ra mè meitè descasa a Coronà.
22
Ro sciò Gian Pero intanto accoregoù
Gh'era passoù da vei ro frizorà,
Pallido, freiddo, mutto e spaventoù
Ro Cè mirando senza parpellà
Chiamando chinze votte d'intr'un scioù
Ro Segnò chi ro voeggie liberà
Fà voto impì ro bielo de so man
A doze poveretti all'un deman.
23
Ma chi Signoi a manco no se poè*
De n'azonze duì versi spuzzorenti
Ch'oeggio sentì da tutti dime oibbò
Chiu presto che tegnimel'intri denti
Aggiuteme un pò vuì sciò Nicolò
Che ne sei ben informoù*, che badamenti
Per cosa così rera e si eselente
Non è ra lengua mè sufficiente.
24
A piè dro sciò Gian Piero se ne stava
Un caro Patronetto li areverso
E miezo morto a bocca sterita o fava
Con ri denti chiavè ro voto terzo
L'annima che d'uscì se ne sercava
Veggando che de dato no gh[']è verso
S'incaminna da basso all'hora quando
Che sentimmo derrè cantà d'Orlando.
25
No me stè a dì dro toso, ni dro raso
Sospirè pù ghe diggo, Patron caro
Scioreve con ri amixi, ma ro naso
Sareiva pù raxon respettezaro
Ohimè ro coè, re biele, oime ro vaso
Bagneme, ohimè, che ziro, ohimè che varo
Pe ra penna havè cura ra marinna
De daghe intanto quarche sborradinna.
26
Ma ro miegio è da poè, che quando penso
Che ghe sè un po mancoù ro pattimento
Con ro mè naso accorzeme incomenso,
Ch'in duì loeghi è schiuppoù ro morimento
Nisciun savè se deiva con quest'insenso
Morì primma de spuzza, o de spavento
Basta, che tra ro Tappo e spinorello
Restà ben despaccioù ro Carattello
27
E toccando a un amigo per ventura
De levà questa missa in fin de Tora
Levando con ra sassora ra pura
Miegio che fè però Piero ra pora
Un Lazaro pareiva in seportura
Con revei ben ri conti in fin dra fora
Meschiando quello d'atri con ro sò
Pero appannava là diggando ohibbò.
28
Un po chiù in là ro sciò Madon* se veiva
Morto sciù ro paggioè mezo boccuo
Che con re masche mè croù o l'havereiva
Intro miezo segoù serto un'aguo
Diggando meschin mi, no me ro creiva
Aggiuteme Segnò che son perduo
Houra houra semo a moeggio, e per chiu impaccio
Che si andemo de là senza ro spaccio.
29
O meschin mi, che ro coè sì me l'ha dito
Questa votta da mi me l'ho agurà
Ch'intro partì de Cà per fà chiu fito
Me son desmentegoù ro manuà
Si che ghe troveran tutto lì scrito
Quando a Cà mi no posse chiù tornà
Cosi in sta poira o se n'andava in ere
Contento de lascià re cose chiere
30
In tanto ro Dottò con re parrè
Stramenava ro Remo a chiù no posso
Ma in sciù dui piè delongo instantarè
Stentaimo sempre chiù à satà ro fosso
E ro vento buttandone inderrè
Dava da roziggià un cattiv'osso
Tanto che per trè hore se non erro
Reventamo voggando sciu ro ferro.
31
Ma sentime, e stupì, mentre moriva
Ogn'un de nuì cianzando l'arabia
In un Amen ro Cè, che moè no priva
Dro santo aggiutto so chi in Liè confia
Pregoù da nuì chiù votte con fè viva
Scentoù ro vento, n'aschiannò* ra via
Onde nuì con ra forza tutta quanta
Zeme* infin a investì ra Terra Santa.
32
Così la sciù ra pointa intro* deserto
Piggiando presto e ben Porto Pigoeggio
E d'esse sarvo ogn'un restando serto
D'allegrezza ad ogn'un brillando l'oeggio
Ri morti vivi de comun consenso*
Carando inzenoggiè baxian ro scoeggio
Cantand'alliegri ogn'un da ro [so] canto
O sasso amato et honorato tanto.