Piaggio M. - Poesie 1846/Viaggi e Campagnate/A partenza da Diligenza
| ←Gita a Savonn-a cö Vapô | Poexie de A partenza da Diligenza |
Varietæ→ |
| (ediçion Pagan - 1846) |
« L’ëa do meize là d’agosto
« Quando e grigoe fan l’amô,
« E che secca a tæra, e o costo
« Pe-o gran cädo che fa o Sô »
Vêuggio di cö Sô in Liron ;
Pe eseguî ûnn-a commiscion
D’ûn mæ amigo de Piaxenza,
De mandâ co-a Diligenza
A ûn so barba de Milan
Un pacchetto de saffran,
Quello giorno da partenza
Me leveì de bon mattin
Per mi mæximo portâlo,
E a cautela consegnâlo
In moen proprie do Vettuîn,
Vêuggio dî do Condûttô.
Spuntezzava allöa l’arbô
Ch’ëo nell’atrio do Locale
Dove sciorte a Diligenza
Zà imbottïa per fâ partenza,
Ma se gh’ëa rotto ûn fanale,
E per fâlo accomodâ
Se mandò a ciammâ o Vedrâ;
S’impì l’atrio e i corridoî
D’Ommi, Donne e Viaggiatoî,
Paenti, Amixi e Conoscenti,
Camalletti e Servitoî,
Bauli, Sacchi e atri tormenti...
Chen e Cagne a reggimenti
Che no favan che bajâ,
Che scorrîse e scomp....
E mi ascì m’han rinfrescôu.
Mentre stavo a passeggiâ
Me son proprio recillôu
Pe-o spettacolo epizodico
Che davanti a-i êuggi aveivo
Sempre vario, da formâne
Un oposcolo romantico;
Comme ûn matto me ne rieivo,
Ma, frattanto rifletteivo
A-e miseje nostre ûmane
E a-e vicende differenti
Che se soffre da-i viventi:
E pe-a primma bella cosa
Osserveì in t’ûn canton
Unn-a Cappellinn-a ascosa
C’ûn Buscietto in marscinon...
Se ciccioava, se fremmeiva,
Se sospiava, se cianzeiva,
Dagli, picca, zêugo... fallo...
Doppo ûn ciocco de metallo
Madamminn-a se retïa
Ritornando allegramente
All’insegna do Serpente,
Armâ in corso e mercanzïa,
E lasciando o Babbazzon
Pensieroso in t’ûn canton.
Quæxi dirimpetto gh’ëa
Un Coscrîto chi passava
A Turin , con çerta cëa
De piaxeì chi consolava;
Ma o gh’aveiva Poæ, Moæ, Sêu
Che cianzeivan singhiossando
E façeivan strenze o coêu...
Ghe dixeivan: chi sa quando
Se veddiemo!... l’abbrassavan
Tûtti streito e se o sûssavan...
Lê, ch’o l’ëa zà Caporale
E pe-a guæra trasportôu,
Ghe paiva ëse ûn Generale...
O n’ëa ninte desgûstôu;
Quando in scocca o l’è montôu
Con intrepido coraggio,
A-e due Donne vegnì mâ,
Senza poeighe dâ o bon viaggio
Manco poeilo ûn pö ciù ammiâ,
Lê o no s’è manco ciù giôu!...
Ritardava a Diligenza
Un pö troppo a fâ partenza;
Gh’ëa ûn Scignor co-i baffi affiæ,
Sciantiglioîn tûtti arrissæ,
In gran tonaca vestïo
Con berretta orlâ de peì,
Unn-a clava in man da Orlando,
he impaziente passeggiando,
E fûmmando comme ûn Beì
O dixeiva ira de Dio
Giastemmando a ciù no poeì
A Carrossa, o Direttô,
I Cavalli, o Condûttô,
O Fanâ, e o Vedrâ... dixendo
Con ûn ton de voxe orrendo:
« Che o l'aveiva gran premûa,
« Che da-o tempo ch’o perdeiva
« A so sorte dipendeiva...
« Che gh’andava do so onô,
« Nè o vêu fâ brûtta figûa...
Intimando a-o Condûttô
« Che se o sta ciù ritardando
« O se piggia ûnn-a Vettûa
« Pe andâ in posta e protestando
« Contro chi de drïto etçettea
« Pe-i so danni, speize etçettea!
Ma frattanto o se tappava
Ben a faccia, e o l’osservava
Dappertûtto attentamente
Tiando sempre de giastemme!...
Sento ûn sciäto tûtt’assemme,
Me gïo e veddo ûn rêuo de gente
E descrêuvo o Sciö co-i baffi
Immanexellôu da-i Zaffi
Che te-o portan in prexon!...
Pe ûnn-a semplice raxon
(Raccontava ûn maldicente)
Ch’o l’ea càrego de stocchi,
Eh!... de quelli ben co-i fiocchi...
Che o ne fava profescion
Voendo vive oziosamente,
Mangiâ e beive allegramente
Senza mai pagâ nisciûn!...
Ho capïo! (disse ciù d’ûn)
Cose a l’ëa tanta premûa
E a so grande ciarlaxïa!...
Vanni là, che ti è in Vettûa!
Ti væ in posta a Sant’Andrïa!!
Mi, compindo a-o mæ doveì,
Ghe crieì forte: Scignorïa!
Chi me fesse rïe davveì
O fù ûn bello Originale,
Da no poeì trovâ l’eguale,
Degno proprio do Calotte,
Vestïo comme Don Chisciotte,
C’ûnn-a faccia con treì menti,
Unn-a bocca senza denti,
Unn-a pæsta de nasælla
Pezo che Puriscinella
Chi appartoiva di purrin;
Spalle immense, gran trippon,
Da no poeì appontâ o gippon,
Gambe grosse, pê piccin,
E d’ûn taggio straordinajo;
O façeiva l’Inventajo,
Ben chinnôu, sotto a ûn barcon,
Repassando ûn çestinon
Pin de röba da mangiâ,
Comme se o dovesse stâ
Unn-a settemann-a in viaggio,
E o dovesse moî dä famme!...
Carne, pesci, pan, formaggio,
Êuve, frûta, ûn gran salamme,
Træ polanche, duî cappoîn
E per l’ûltimo ûn bibbin!....
O gh’aveiva de derrê
A-o contatto cö panê
Un gran bottiggion de vin
Che o me paiva monferrâ.
Unn-a Fraule zovenetta
A l’ëa lì tûtta affannâ
A levâghe a perrûcchetta
Per sciûgâghe con amô,
E con bella grazia, o sûô
Chi ghe scuava zù a bronzin.
Me gh’accosto cianciannin;
Lê, che o sente avvixinâse;
O se vorta, e in to vortâse
Perde l’equilibrio, e pon!
O va là comme ûn strasson
Cazze addosso a-o bottiggion
Chi va in tocchi e spande o vin
E se no gh’aggiûttan sûbito,
O ghe nega ciù ûn pittin!...
O fischiava comme ûn’aquila,
O bnffava comme ûn bêu,
E o cianzeiva da-o desgûsto
Meschin! pezo che i figgiêu!...
Misso in salvo questo fûsto
Avariôu, sdruscïo e appullôu,
Restò o portego allagôu,
C’ûnn-a spûssa d’imbriæghêua
Da fâ batte in ritirata...
Portòn presto da serrêua,
E finì c’ûnn-a risata
Quella comica cascata
Chi fè rïe finn-a a Servetta
Che a se misse a perrûcchetta
E piggiò ûnn-a gran cioccata.
O fanà o l’è accomodôu,
E o gran Condûttô installôu,
Che con quattro scurriatæ
O dà o segno da partenza.
I ciù lesti e ammaliziæ
Montan presto in Diligenza
A piggiâse o mëgio posto
Per non ëse missi a rosto
E stâ commodi assettæ
Pretendendo conservâlo...
Ma dovèn presto lasciâlo
Perchè o Direttô o portò
O gran libbro, e o l’assegnò
A so piazza a chi spettava,
E con vëo ton magistrale
E ûnn-a voxe arci-nasale
A ûn per votta o te i ciammava
Comm’ëan scrïti ne-o giornale;
Chi montava, chi chinnava,
Chi scûggiava, chi cazzeiva,
Chi in sciâ röba se montava,
Chi sbraggiava, chi taxeiva,
Chi ëa contento, e chi no l’ëa...
Figgi cäi, che confûxion!
Paiva proprio ûnn-a galëa!...
Ma in te quello cangiamento
Rieivo pe-a combinazion
E pe-o strano assortimento
E di Posti, e di Soggetti.
Per exempio: se veddeiva
Un Abbate ottuagenajo
In sottann-a co-i speggetti
Mogognando o so breviajo,
Che dappresso a lê o gh’aveiva,
Unn-a Comica elegante,
Zuveniscima contante
Solfezzando o so rondò;
A ûn Stûdente ghe toccò
D’ëse accanto a ûn Moralisla;
Se trovava ûn Letterato
Dirimpetto a ûn Abbachista;
Se veddeiva ûn Avvocato
Vis-à-vis d’ûn Usûrajo;
E restava ûn Gabellotto
Assettôu c’ûn Miscionajo;
Gh’ëa ûn Lenguista c’ûn Barbotto,
E ûn Ciarlon c’ûn Commissajo;
E osservavo, malgré soi,
Un Magnifico dappresso
A ûn chi lezzeiva Le Roi
Decantandone o sûccesso;
Gh’ëa ûn pesson de Marcantonia
C’ûn Invalido cacchettico
Chi s’arviva da-o toscî;
E gh’ëa ûn Militare ercûleo
C’ûnn-a Madonnava elastica
Chi tombava da-o dormî;
Gh’ëan però ben missi a lêugo
Un Sûnnôu dappresso a ûn Chêugo,
Due Camëe c’ûn Servitô,
E co-a so Laica ûn Fattô;
Ma o ciù mëgio ancon piazzôu
O l’ëa ûn Poeta Pe-Dantesco
Da lê solo a-o largo e a-o fresco,
Ghe gh'ëa o posto vêuo restôu
Do Scignor stæto allûgôu.
S’aspëtava ancon da gente,
Se presenta finalmente,
Varda a bomba! ûnn-a Donnassa
Longa, larga, grossa e grassa,
Arriondâ comme ûnn-a giära,
E ciù brûtta che a Bazära!
C’ûn enorme cappellon
Fæto a moddo de chittära,
E fasciâ in t’ûn gran sciallon
Cô de fêugo con frangiammi;
A pezava (ghe scommetto)
Çento Vinti kilogrammi!
E ghe vosse ûn arganetto
Per asbriâla con gran stento
In carrossa; e intrando drento
A ghe dè ûn strapicco tale
Che a rompì torna o Fanale,
E a piggiòn pe ûn Oragan!...
S’ëan zà tûtti dæti man
Per scappâ d’in Diligenza,
Stæ a sentî (se gh’eì pazienza)
Che aoa semmo in to rognon;
Sta montagna de Donnon
A s’assetta impattarâ
Dirimpetto a ûn secco secco,
Longo tiôu, cô do festecco,
Ch’o l’andava aja a cangiâ
A Milan per çerto mâ...
Ma o dev’ëse morto in viaggio!
Comparisce tûtto ausciôu
Un Gobbetto derennòu,
Chi spûssava de contaggio,
Con Livrëa strassâ olim gianca,
A portëa presto o spalanca
Per ficcâ drento ûn gaggion
Dov’ëa ûn vegio pappagaggio,
Che Madamma Pattafion
Tiando presto sciû e fädette
Fra e so lunghe storte a-o mette,
A sentî questo marviaggio
O no fava che sbraggiâ,
Sghêuâ, corrî, fischiâ e beccâ,
Con fâ ûn sciäto maledetto!...
Tûtt’assemme sento criâ
Da ûnn-a voxe de galletto:
Ahimè mi!... levælo presto...
Ch’o me svenn-a!... ohimè che dô.
No ne posso ciù... son lesto!...
Oh che penn-a! ahi che brûxô!...
Sci scignore, o Coccoretto
De pittâ o se divertiva
E gambette a-o Mûxichetto,
E l’ex-polpa sangue a scciuiva...
Criavan tûtti che a-o levasse
E che a casa a-o rimandasse...
Ma Madamma, oibò! a no voeiva,
A cianzeiva, a se despeava...
Che grimmasse che a façeiva!
E che flati lunghi a tiava!...
Ciammòn presto o Direttô,
E ghe vosse i savj e i matti
Presentâ e due gambe ai atti!
Per sciortine con onô;
Ghe streppòn per forza a gaggia
Cö Tesoro che gh’ëa drento;
Restò o Seneca contento,
Ma a Bazära dä gran raggia
A l’è andæta in svenimento,
E per fâla rinvegnî
Gh’è vosciûo ûn assortimento
D’ægue, spiriti e d’odoî;
Doppo questo avvenimento
Finalmente a Diligenza
Cicche-ciacche a fa partenza
C’ûn fracasso da insordî!...
Ancon questa stæ a sentî
Che a vâ lê tûtti i dinæ:
Un Stortetto arrensenïo
E co-i êuggi sciarpellæ,
A-a seiçentesca vestïo,
Pettenôu con puvee e buccoli,
Manexelli, xabbò e mascoli,
Spâ, baston, relêujo e pendoli,
Comme ûn’annia o se rebella
Pe andâ a dâ l’ûltimo addio
E riçeivio dä so bella!...
Da Carrossa o cöre in gïo:
Ferma! ferma! (o crïa frenetico)
Conduttore, che son io!...
Cose voeì?... mentre o s’affaccia
Da ûn portello (oh caxo orribile!)
Te gh’arriva ûn scracco in faccia
Dell'Invalido cacchetico
Chi te l'ha mëzo inguersïo!...
A Carrossa a piggia o vattene
Camminando comme ûn fûlmine,
Lê restò macco e avvilïo
Comme Olimpia sorve o schêuggio,
Con sciaccâ a tûtti de l’êuggio!...
Doppo stæto ûn pezzo estatico,
Vegnûo mëzo paralitico,
O tiò fêua ûn interminabile
Mandillelto gianco lacero,
E per compimento d’opera
Gemebondo e inconsolabile,
Doppo fæto o nettezzimini
Et andæto in irascimini,
Streppellandose i so toppoli
E sciûsciando comme ûn mantexo
O cacciò ûn longo sospïo,
E.... o se misse in stacca! addio.