Piaggio M. - Poesie 1846/Varietæ/Spiritositæ
| ←Avviso salûtare | Poexie de Spiritositæ |
O qui pro quo→ |
| (ediçion Pagan - 1846) |
Introdûto fù ûnn-a votta
In brillante, scelta e dotta
Societæ, ûn gran Letterato;
O sò arrivo fè do sciäto,
E causò dell’invexendo;
S’andò sûbito sparzendo
Che ûn Virtuoso grande o l’ëa;
Ghe fèn tûtti da gran cëa,
E l’andavan cortezzando
Con riguardi e con manëa:
Mentre o stava contemplando
Tante belle in eleganza,
Verso lê presto s’avvanza,
Tûtta linci e squinci, quella
Che a despëto da brigata
A voeiva ëse a ciù garbata
E a ciù spiritosa e bella:
(Ma a l’ëa incangio ûnn-a scemmella!)
A se mette in poxitûa,
A s’accommoda o bocchin,
Te ghe fa ûn bello squaccin,
E con voxe appascionnâ
A ghe dixe: « Son vegnûa
Per pregâlo a no privâ
Da so grazia a Societæ,
Ma de voeîla anzi graziâ
De so grazie rinommæ,
Fâ sentî a so abilitæ...
Con sorpreiza a Dotto allöa
O ghe disse .... « Ma, Scignöa,
Cöse posso aoa chi fâ?...
Ghe rispose a nescia: « Oh bella!
Sciä ne cante ûnn’Aja bella.