Piaggio M. - Poesie 1846/Varietæ/Sûnetti/A-e Campann-e
| ←Addio a-e Grondann-e | Sûnetti de A-e Campann-e |
Riçetta pe fâ i Raviêu→ |
| (ediçion Pagan - 1846) |
Sûnetto.
Belle Campann-e cäe! quando a finieì
De rompî giorno e nêutte o sêunno e a testa
Con quello vostro sôn chi ne molesta
E ne fa taroccâ senza piaxeì?
D’ëse forse armoniose ve creddeì?
Che atro no fæ che battaggiâ da festa
E pe-i Vivi, e pe-i Morti, e pe-a Tempesta,
E tûtti i Santi giorni ûn Santo gh’eì!...
Chi ælo che pêu resciste da vixin
A quello vostro eterno din-don-dan
Che ne fæ dilûviâ da-i campanin?...
Beneito sæ i Paizotti che no n’han,
E e Conchette astrûnnæ di Cappûssin
Per l’Ave e per ciammâ in Gexa o Cristian!