Piaggio M. - Poesie 1846/Varietæ/O Villan giûdizioso

Da Wikivivàgna
Poexie de Martin Piaggio
O Villan giûdizioso
(ediçion Pagan - 1846)
[p. 823 modifica]
O Villan giûdizioso


A moggê d’ûn paisanetto,
Fastidiosa de sò fâ,
Doppo d’ëse stæta in letto
Quattro meixi assæ aggravâ,
A restò ûn giorno assûppïa
Da ûnn-a forte letargïa.

Tûtti morta a giûdicavan,
E fasciâ in t’ûn lensêu fin,
Mentre in Gexa zà a portavan,
A scontrò in te di spinoîn,
Che punzendoa a resveggiòn,
Presto in casa a reportòn.

Dopp’ûn anno a moî davveì,
E portandoa a sotterrâ,
Disse o majo; fæ o piaxeì
Da-i spinoîn no a fæ passâ,
Perchè dunque ammanaman.....
Che giûdizio da villan!