Piaggio M. - Poesie 1846/Varietæ/Botta e Risposta
| ←L'Equivoco | Poexie de Botta e Risposta |
Meschin chi se gh'intoppa→ |
| (ediçion Pagan - 1846) |
Dorinetta vanarella
A-i sò tempi stæta bella,
Ma che i anni ghe cresceivan,
E zà e rûghe se veddeivan
A l’andava consûltando
O sò spëgio rinfrescando
Con lavande e con gianchetto,
Con pomæ, inciastri e rossetto
E magagne da sò cëa;
A dixeiva ä sò camëa,
Chi ëa ciù tosto ûn pö brûttetta,
Ma ben fæta, e zuvenetta;
Rosinin dimme a veitæ?
Se ti avesci di dinæ
Quanto ti paghiesci l'öa
Per aveì a mæ bellezza?
A rispose con franchezza:
Tûtto quello, caa Scignöa,
Che paghiesci, e ninte ciù
Pe acquistâ a mæ zuventù.