Piaggio M. - Poesie 1846/Varietæ/Acconto de pagamento
| ←Inconveniente pe-a someggianza | Poexie de Acconto de pagamento |
Semplicitæ→ |
| (ediçion Pagan - 1846) |
Unn-a votta, ûn Scignorin
Un pö cûrto de dinâ,
Accattò do panno fin,
Tempo ûn meize per pagâ.
Passò o meise e l’anno ancon,
Nè o pensò a pagâ o Pattê,
O quæ stûffo, e con raxon,
O l’andò a trovâlo lê,
E o ghe disse con gazzæa,
Che l’ëa tempo de pagâo....
Lê rispose - n’ho monæa....
Lê se misse a mätrattâo,
E inscistendo.... e dàlli.... e tocca....
O ghe desse due maschæ
Che gh’andò treì denti in bocca
E o scappò a gambe levæ.
O Pattê cädo bugïo
Per giûstizia o se n’andò,
E o sò debitô fallïo
Da-o sciö Giûdiçe o çittò,
E o ghe disse — St’assascin
Çento lïe o m’ha da pagâ,
Gh’ho vendûo do panno fin,
Manco ûn sodo o me vêu dâ.
E per cose fæ o testardo?
(Disse o Giûdiçe) paghæ....
No, o rispose, o l’è ûn boxardo,
Gh’ho zà dæto due maschæ.