Piaggio M. - Poesie 1846/Esopo Zeneize/O Prinçipe e o Roscignêu
| ←O Rango, o Zembo e l' Orbo | Esopo Zeneize de O Prinçipe e o Roscignêu |
A Lûmassa→ |
FOA LIV.
O PRINÇIPE E O ROSCIGNÊU.
Un Prinçipin ûn giorno o passeggiava
In mezo a-i boschi cö so Governante,
Ma non essendo guæi da caccia amante,
Incangio de spaziâse o se tediava;
O sente tûtt'assemme ûnn’armonia,
E o vedde in t'ûn erboetto ûn Roscignêu
Chi canta coscì ben; piggiâlo ö vêu,
Ma o fa do sciato, e quello scappa via;
E perchè (o disse allöa pin de venin
A-o so Mentore) o ciù bravo e grazioso
Fra i oxelletti o sta in ti boschi ascoso,
Mentre ho o palazzo de Fanetti pin?....
Altezza, (o replicò) perchè imparæ
Fin d’aoa, che i sûperbi e i presuntuosi
Se san prodûe da lö, ma che i virtuosi
Stan sempre ascosi, se no son çerchæ.
