Piaggio M. - Poesie 1846/Esopo Zeneize/O Luvo e a Vorpe

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Luvo e a Vorpe
[p. 103 modifica]

FOA XLVII.


O LUVO E A VORPE.


Oh quondam mæ Messiavo! sempre de gran memoja!
Primmo Eroe do so secolo, da scrivine l’istoja!
(Dixeiva ûn Lô a ûnn-a Vorpe) quello chi ha fæto sciato!
Terribile, temmûo da tûtto o vexinato!
Ne-i boschi formidabile, pe-i monti, e in ta ciannûa
A tûtti, e da per tûtto batteiva sempre a pûa;
De mille so nemixi, de tûtti o l’ha trionfôu
Scannandoli a ûn per votta con gûsto... ma peccôu!
Doppo tante prodesse ûn giorno in to ciû bello
O l’ha dovûo succombe gloriosamente in duello!
Oh perdia irreparabile! oh gran disgrazia! oh morte!
Cianzeì, Luvi, ch’eì perso o vostro brasso forte!...
Bravo! (rispose a Vorpe) aoa ti t’è spiegôu
Comme ûn Panegirista da morti esagerôu;
Ma ûn Storico imparziale, per no contâ de föe,
Avieiva dito sûbito do to sûpposto Eröe:

Ammiæ che i gren nemixi da lê vinti e mangiæ
Un doppo l’atro, ëan tûtti Axi, Coniggi e Bæ
E che quello nemigo chi o fè presto accoegâ
È stæto o primmo Toro , ch'o l'ardì d’affrontâ.


Piaggio46-14.gif