Piaggio M. - Poesie 1846/Esopo Zeneize/O Figgiêu e o Spëgio

Da Wikivivàgna
Esopo Zeneize de Martin Piaggio
O Figgiêu e o Spëgio
[p. 101 modifica]

FOA LVI.


O FIGGIÊU E O SPEGIO.


Un Figgiêu stæto allevôu,
Ma scordôu
Troppo a Mamma in t’ûn Paizotto,
Reizo in casa, o fù sorpreizo
D’ammiâ appeizo
Un gran Spëgio in t’ûn salotto;

Tûtt’assemme o se compiaxe,
Che ghe piaxe
Quella so fisonomia,
Da lì a ûn pö ghe fa mill’atti
Comme i matti
Per despëto e frenexia,

E de vedde ûn comme lê
Drito in pê,
Che s’o rïe, quello ghe rïe,
Se o s’arraggia, quello arraggia,
Pin de raggia,
O s’addenta i labbri e e dïe;

Poi rûggindo comme ûn Lion,
Dà ûn patton
Forte a-o Spëgio, e o se fa mâ,
E de véddiseo rebatte
Torna ö batte,
Poi se mette a cianze, e ûrlâ;

Capitò a Mammà a-o momento,
Che de drento
Tûtto ben a l’osservò,
E a ghe disse, con baxâo,
Figgio cäo,
Sta a sentî, te consoliö.

[p. 102 modifica]

Quello Figgio che li veddi,
E ti o creddi
Un cattivo, e to nemigo,
O l’è in cangio ûn bon figgiêu,
Bon de coêu,
Chi vorrieiva ëse to amigo;

Ti pe-o primmo ti l’hæ ammiôu,
Intissôu,
Fæto bæffe, e ti g’hæ dæto,
E lê incangio o s’è difeizo,
E o t’ha reizo
Sole quanto ti g’hæ fæto;

Mïalo un pö, mettite a rie .. ..
Comm’o rie!
Dagghe a man ... lê te dà a man,
Aoa abbrassilo.... fa paxe
Che o te baxe...
O te baxa fin doman!

Figgio, impara, aggi presente,
Tegni a mente
Questo Spëgio: In societæ
Chi fa mâ, riçeive mâ:
No ne fâ! . . .
Fa do ben, che ti n’aviæ.