Piaggio M. - Poesie 1846/Esopo Zeneize/L'Aze e o Cavallo
| ←L'Erboo de Röve e l'Erboo de Meì | Esopo Zeneize de L'Aze e o Cavallo |
O Villan e a Vigna→ |
FOA LXXIV.
Un Azenasso gh’ëa
Invidioso, sûperbo, e fanfaron,
De quella razza vëa
Coscì testarda e fëa
Che a-i nostri tempi se ne vedde ancon.
Vedendo ûn giorno andâ
Un bello Cavallin a-o gran galoppo,
Oo fè presto affermâ
E o l’ardì de sfiddâ
A chi caminn-a ciù pe-o giorno doppo.
O Cavallo sdegnava
D’ aççettâ quella sfidda lì a-o momento,
Perchè o se vergognava,
E troppo s’angosciava
Doveì c’ûn Aze mettise a-o çimento,
Ma poi ben conscideôu,
Anche pe onô do pegasëo Cavallo,
O guante o l’ha piggiôu,
E a-o lêugo destinôu
All’indoman se trovò senza fallo.
A trombetta sûnnò,
Scrollò a testa o Cavallo, e poi nitrì,
E sûbito o piggiò
Un galoppo ch’o sghêuò,
E in t’ûn minûto a so corsa o finì.
L’Aze pin d’impostûa
O scrolla a cöa, e doppo aveì rägnôu
O parte de premûa,
O trotta, o fa da pûa,
Ma frûsto a meza stradda o s’è accoegôu.
O fù misso a fischiæ,
Ma presuntuoso confessâ no vêu
A so inferioritæ:
Se ho perso (o sbraggia), ammiæ
Perchè m’ho infiôu in te sampe ûn puntajêu.
Quanti forman di progetti
A-e so forze superioî,
E vêuan sempre i so difetti
Con l'amô proprio crovî.
