Piaggio M. - Poesie 1846/Esopo Zeneize/L'Aze e o Can
| ←A Passoa e so Figgia | Esopo Zeneize de L'Aze e o Can |
A Villann-a e l'Ortiga→ |
Chi vêu sforzâ o talento,
Mai ninte fa con grazia,
Che e cose fæte a stento
Riescian de malagrazia,
E se fa mincionnâ
Comm’è sûccesso ûn giorno
All’Aze do Moinâ,
Che in vedde sempre attorno
A so Patron ûn Can,
Baxâo, leccâghe a man,
Isâse drito in pê,
E a forza de sätetti
Piggiâ di bocconetti,
O disse fra de lê:
Perbacco! mi che son
Un gran bell’Azenon
De forza e valentïa,
Che stento, e che revento,
Che ho ciù che o Can talento,
Nisciûn manco m’ammïa!
Vêuggio mi ascì ûn pittin
Fâ comme fa o Barbin ,
Me vêuggio accandacâ,
E cose staggo a fâ?...
Un giorno sto mincion
Veddendo so Padron
Mangiâ allegro in famiggia,
Un gran galoppo o piggia,
Ghe va ciannin derrê,
O s’ïsa drito in pê,
Ghe pösa e sampe in spalla
Che spûssavan de stalla,
Gh’accosta o müro ä faccia,
Un ragno forte o caccia,
E per fâghe ûnn-a frasca
Co-i êuggi stralûnnæ
O gh’addentò ûnn-a masca.
Cos’è sta novitæ?
(Sbraggiò o Moinâ arraggiôu)
Garsoîn, dæme o torseôu
Che vêuggio dâ a battûa
A questa scinfonia,
Premiâ tanta bravûa.
Aa vista do torseôu
Quell’ Aze o scappò via
Tûtto mortificôu
Che per vegnî ciù amabile,
E per voeì fâ o grazioso
O diventò angoscioso,
Pesante e insopportabile,
Comme succede a tanti
Presuntuosi Pedanti.
