Piaggio M. - Poesie 1846/Esopo Zeneize/L'Agno e o Cocchetto

Da Wikivivàgna
Esopo Zeneize de Martin Piaggio
L'Agno e o Cocchetto
[p. 114 modifica]
FOA LXVI.


L’AGNO E O COCCHETTO.


Un bell’Agno o caregava
Un Cocchetto chi lavoava;
E per cose (o ghe dixeiva)
Ti travaggi coscì lento?...
Mi te fasso in t’ûn momento
Un lavô, che ghe vorrieiva
In tûtt’atri ciù d’ûn meize;

Fasso stâ per l’aja appeize
De belliscime tägnæ,
E di globi travaggiæ,
Comme i Geometri e Architetti,
E ti incangio ti ghe metti

[p. 115 modifica]

Per fâ ûn cöso lì ammottôu,
Gianco, giano, ingarbûggiôu
Dexe giorni travaggiando
Giorno e nêutte, e mogognando.

Ghe rispose allôa o Cocchetto:
No stâ a fâ tanta bombæa,
Se travaggio ûn pö adaxetto,
L’è perchè mi fasso sæa
Chi è de lûsso e ûtilitæ,
E che a vâ di gren dinæ;
Ma ti incangio coscì lesto
Cose fæto? per fâ presto!...
Unn-a teja d’impostûa
Solo bonn-a a acchêuggie pûa,
A inciastrâ mûäggie, e a ingannâ
Qualche mosca da mangiâ,
Che se sûscia ûn pö de vento
A va in pessi in t’ûn momento.

Fabbricanti e Venditoî,
Questa foetta a l'è per voî.