Piaggio M. - Poesie 1846/Esopo Zeneize/I duî Infermi

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
I duî Infermi
[p. 164 modifica]

FOA C.


I DUI INFERMI.


Ghe regnava in Lombardia
Unn-a grande epidemia
De frevasse mascarsonn-e
Che ingûggeivan e personn-e.

Fra lô i Meghi consûltavan,
Comme libbri discorrivan,
Ma con ciù rimedii davan,
Per despëto e genti moivan,
Chè chi aveiva o miasma adosso
Ea segûo d’andâ in to fosso.

S’afferrò questo malô
Un Pöeta, e ûn Fornitô,

[p. 165 modifica]

Tûtti dui Zoveni assæ
E da stessa complescion,
Scarso o primmo de dinæ,
O secondo gran riccon,
Perchè bravo in abbaccâ
O guägnava largamente ,
L’atro a forza de rimmâ
O viveiva parcamente.

Stava o poveo letterato
In t’ûn letto, e in t’ûnn-a stanza
Dove i venti favan sciato,
E a miseja a contraddanza,
C’ûn lensêu tutto pessôu
E ûn oeggê mezo sbëlôu!
Ma co-a freve chi o sbatteiva
Gran coraggio o se façeiva:

O mandò o Mego a ciammâ,
Ch’o gh’andò non senza stento,
Doppo fætose aspëtâ,
In te l’öa do montamento,
Presto o püso o gh’attastò,
O sbattè a bocca e scrollò
A perûcca misterioso!...

O Pöeta sospettoso,
Invâzôu dall’estro poetico,
O ghe disse in ton patetico,
Abbrassandoseghe a-o collo
Quæxi a segno de strangoâo:
« Semmo, amigo, e Mego cäo,
« Tutti duî figgi d’Apollo,
« A to arte a pêu ëse ä mæ
« D’ûnn-a grande ûtilitæ;

[p. 166 modifica]

« Se ti fæ che a mæ personn-a
« Sann-a a sciorte da sto letto,
» Mi dinæ no te prometto,
« Ma te paghiö in Eliconn-a
« Generosamente!... e comme?
« Con eternizzâ o to nomme
« Ne-e mæ poetiche ghirlande
« Che appendiö da tûtte e bande,
« Mego cäo!... me raccomando...

O magnifico chi andava,
Mentre o Vate delirava,
In sà e in là sempre occezzando,
Chè per mobili o veddeiva
Due carëghe senza setto,
Un saccon chi se ne rieiva,
Di gren libbri sotto o letto
In te schenn-e scavissæ;
Poco amante da Poexïa,
Portôu solo pe-i dinæ
O ghe disse: « Scignorïa ...
Pe aoa ninte gh’è da fâ...
Ritorniö doppo disnâ,
Che veddiemo! ... e o se n’andò;

Ma d’andâghe o se scordò,
Perchè o Fornitô aggravôu
Tûtti i Meghi o consûltava
Da çittæ, e lê ascì ciammôu
Da-o so letto o gh’ordinava,
( Con tant’atri Professoî
Impegnæ a no fâlo moî )
D’ogni pö medicamenti,
Scioppi, unzioîn, pilloe e fûmenti,

[p. 167 modifica]

Senapismi, vomitivi,
Vesciganti, lavativi,
E gh’ëa sempre procession
De bottigge, bottiggette,
Tondi, gotti, àmoe, cannette...

Ma con tanta profûxion
E de Meghi e de dottrinn-e,
De riçætte, e de meixinn-e,
De dinæ speizi, e de cûa ,
E ascistenti d’ogni menn-a,
Doppo o quinto giorno appenn-a
O l’ëa zà in ta seportûa.

L’atro incangio, meschinetto!
Lasciôu solo in to so letto
Senza Meghi, nè meixinn-e,
Per mancanza de roscinn-e,
C’ûn pittin d’ægua ascädâ
Ch’o beveiva ä caffettëa
Doppo o quinto giorno o l’ëa
Zà co-e Mûze a conversâ:

Anzi dixan, ch’o l’ha scrito
Un famoso Manoscrito
Con l’Istoja da maottia,
E in sciä Forza da Natûa,
Ch’o l’è stæto a megio cûa
In te quella Epidemia,
Ma che ûn Mego c’ûn Speziâ
No ghe l'han lasciôu stampâ.