Piaggio M. - Poesie 1846/Esopo Zeneize/A Sinsaa e a Cæbella
| ←A Vipera e a Sanguetta | Esopo Zeneize de A Sinsaa e a Cæbella |
I duî Infermi→ |
FOA XCIX.
Là de lûggio ûnn-a Sinsaa
Verso nêutte a l’ affermò
Mentre a sghêuava ûnn-a Cæabella,
E a sto moddo a ghe parlò:
« Ti hæ mai visto insetto a-o mondo
« Ciù de mi ûtile e valente?...
« Mi son brava in chirurgia!
« Mostro all’ommo ëse paziente!
« Mi, do sêunno gran nemiga,
« A lê insegno a vigilanza,
« Che l’addescio da tûtt’öe
« Co-a mæ tromba , e co-a mæ lansa;
« Mi da bravo generale
« Con de tattiche impreviste
« Vaddo, vegno, veddo, vinso,
« Porto in trionfo e mæ conquiste!
« Comme ûnn’aquila mi sghêuo
« Ata e bassa , onde me pâ!
« E ti incangio, pötronassa,
« Cose ti è mai bonn-a a fâ?...
A Cæabella ghe rispose:
Ti t’inganni, figgia caa,
Perchè o ben che ti decanti
Ti te o fæ per ti, Sinsaa;
Ti ti sûssi o sangue all’ommo
Co-a to punta maledetta,
Ti l'addesci quando o dorme,
Ti o stordisci co-a trombetta;
Ma pe impîte ben a pansa
Quæxi a segno de scciûppâ,
Poi ti scappi sghêuando a stento
Senza manco ciù sûnnâ;
Queste son tûtte e to glorie,
E a to grande abilitæ!...
Taxi, Sêu do Pappetaxi
E malanno veo da Stæ!...
Mi de fâ do ben all’ommo
No me vanto, nè pretendo,
Ma con quello lampionetto,
Ch’ho derrê, e de nêutte aççendo,
Quand’o l’è pe-e stradde a-o scûo,
Me gh’accosto e ghe e resccæo
Ciù che posso, e me sciallievo
De poeì fâghe ancon ciù cæo:
Questo è quanto a mæ natûa
Me permette de poeì fâ;
Ma no punzo, nè insordiscio,
Nè me sento giastemmâ.
A Sinsaa a l'è o finto amigo
Chi ve sciûga a borsa e o coêu;
A Cæabella incangio o vëo
Chi ve fa do ben, se o pêu.
