Piaggio M. - Poesie 1846/Esopo Zeneize/A Vorpe morta
| ←A Sinceritæ e a Finzion | Esopo Zeneize de A Vorpe morta |
L'Erboo de Röve e l'Erboo de Meì→ |
FOA LXXII.
Unn-a Vorpe decrepita,
Famosa e assæ temmûa
Pe-i gren gallinicidii,
Pagò o drito ä natûa;
A so morte a fù celebre,
E tûtti i Pollastretti
Ghe fèn o fûnerale
Cacciandoghe i sûnetti;
I Polli d’India, i Anitre,
I Oche co-i Piccioîn
Gh’andòn co-e ciûmme in galla
A brassetto a-i Cappoin;
Ogni animâ volatile
Vosse per cûxitæ
Andâ a vedde o so corpo,
Benchè o spûssasse assæ.
Un Gallo per tripûdio
Sciä pansa ghe montò,
E o chirichì cantando
A giga ghe ballò;
Ma ûnn-a Ciossa tristiscima,
Aggueitando dä porta:
No me gh’accosto (a disse)
Chè temmo a Vorpe morta;
Quando sta mascarsonn-a
A me scannò i figgiêu,
Co-i êuggi streiti, e cuccia
A stava comm'anchêu;
A veddo morta a perfida,
E lonxi da-o mæ nïo,
Ma temmo ch’a resciûscite
Coscì no me ne fïo.
Da chi s’è riçevûo do mâ e di torti,
L’è ben stâne lonten e vivi e morti.
