Piaggio M. - Poesie 1846/Esopo Zeneize/A Societæ do Leon
| ←A Sigaa trovâ co-i Grilli | Esopo Zeneize de A Societæ do Leon |
A Çerva e a Vigna→ |
FOA XLVII.
Un giorno ûn Leon feroce,
C’ûn Bêu, ûnn-a Crava e ûn Bæ
Fessan d’amô e d'accordo
Insemme societæ,
Con patti de spartîse
Per quarta parte ognûn
Tûtti i profitti fæti,
Nè se rostî nisciûn.
A Crava e o Bæ fèn sûbito
Pe-i primmi ûn affaretto,
Piggiando ûn bello Çervo
Pe-e corne in to sorchetto.
Fedeli in rende conto
Mandòn presto a ciammâ
O Leon, perchè e vegnisse
E parti giûste a fâ;
Vegni tûtto affannoso
E in aja grave o Leon,
Che o Bêu trovò pe-i boschi
A fâ l’amô e o mincion.
O piggiò presto o Çervo
Co-e sampe, ch’o spartì
In quattro parti eguali,
Che o dividè coscì:
A primma a tocca a mi
( O disse ) e con raxon
Me servo mi pe-o primmo,
Perchè me ciammo Leon;
Me spetta ascì a segonda
Per drito, e per doveì,
O drito do ciù forte,
Ve o diggo se nö seì;
A terza poi pretendo
Pe-o grande eroe che son;
Chi ardisce toccâ a quarta
Me o mangio in t’ûn boccon.
Coscì succede a-o mondo
A-i ommi, che imprûdenti
Çercan d’imbarassâse
Co-i forti e prepotenti.
