Piaggio M. - Poesie 1846/Esopo Zeneize/A Sigaa trovâ co-i Grilli

Da Wikivivàgna
Esopo Zeneize de Martin Piaggio
A Sigaa trovâ co-i Grilli
[p. 82 modifica]

FOA XLVI.


A SIGAA TROVAA CO-I GRILLI.


Ne-o prinçipio là da Stæ,
Quando sciorte e Rondaninn-e,
E van tûtte spampaggiæ
Pë campagne e pê collinn-e
A fâ caccia de moscin
Per portâli a-i so piccin;

Un Villan con de trappette
O l’andava ascì cacciando
Çerti grilli e cavallette
Che gh’andavan devastando
In ta Villa quanto gh’ëa,
E o ne fè ûnn-a rastellëa.

In t’ûn costo o ghe trovò
Con lô ascosa ûnn-a Sigaa:
E ti è chi? birba! (o sbraggiò)
Mentre o l’ëa lì per sciaccâa,
A ghe criò: « Villan, caitæ!
« Ammïa ben cose ti fæ;

« Mi no t’ho mai roziggiôu
« Nè a to frûta, nè a to erbaggia.. »
Non importa, t’ho trovôu
( O rispose pin de raggia )
In cattiva compagnia,
E lê ascì presto o l’infïa.