Per o primmo çentanâ de S.ta Catterin-na de Zena

by Martin Piaggio

Per o primmo çentanâ de S.ta Catterin-na de Zena de Martin Piaggio

Zena, stampaja Pagan, 1837, conservao presso a Libraja Naçionâ Centrâ de Firençe.

PER
O PRIMMO ÇENTANÂ
DE
S.^TA CATTERIN-NA
DE ZENA.

Stampaeia Pagan
1837.

Canzon

---

Sciù, Zeneixi? scialla, scialla!
Destrighæve, e cose fæ?...
Via metteive e gambe in spalla,
Lasciæ tutto, e caminæ
A giâ Zena, e ciù un caruggio,
Che sentieì da tutte e bande
Battaggiâ campan-ne a doggio!...

Giorno anchêu de Festa grande
De piaxeì, de contentezza,
De trippudio, e d’allegrezza!

Che se dagghe ognûn d’attorno,
Vegi, Moæ, Figgie, e Figgiêu
Vestij megio che se pêu,
Perchè è spuntôu quello giorno
Aspëttôu, dexiderôu,
E in Portoja sospìrôu!...

Giorno anchêu de gran Funzion
De resciöu, e divozion
Da spazziâse, e da pregâ;

Giorno proprio da baxâ,
Fin ciù bello luxiä o Sô,
Che da Patria nostra a onô
Se festezza o Çentanâ
Da Zeneize Santa Eroin-na
Fiesca - Adorna Catterin-na;

Santa grande per l’amô
Che a portava ao Redentô;

Santa de gran penitenza,
D’umiltæ, pietæ, e caitæ;

Santa grande pe-a pazienza,
O coraggio, l’ascistenza,
Zelo, e cure prodighæ
Da tutt’öe all’infermitæ
E all’Umanitæ soffrente;

Santa in graddo preminente;
Donna santa ancon vivente;

Donna, che no pêu scordâ
E che cianziä eternamente
Con raxon o nostro Uspiâ!...

Donna rara frà e ciù rare,
De dottrin-na scingolare,

Rinommâ pe-i so eclatanti,
E divin Scriti inspiræ
Sorve i Anime Pûrganti
Per lê megio suffraghæ;

Donna grande, e sovra umana
Donna.... ma penna profana
A no pêu de Lê parlâ!....

Ne a mæ muza, chi è meschin-na,
Pêu de Santa Catterin-na
O so giusto elogio fâ....

Cantiö dunque a gran Funzion
Che se fà in quest'occaxion
Pe-o so primo Çentanâ
Ad eternam rei memoriam
Et Catharinæ gloriam.

E per megio començâ
Intræ un pö ne-a Cattedrale,
Che veddieì un apparato
Che no n’eì mai visto eguale
Pe o bon gusto, o sguazzo, e o sciato;
Con sfarsoze rastellêe
De cristalliche Lumêe,
Lampadaj nêuvi d’argento,
D’un disegno superbiscimo
Elegante Canzionesco

E un ponson diligentiscimo
Raffinôu Macciavellesco;

Artæ in ricco assortimento
De fiorammi!... ammiæ che seje?
Son ciù torcie che candeje!

Messa grande ghe veddieì
Dî, e pontificâ da un Vesoovo
E un-na muxica sentiei
Streppitosa Tassorellica;

Per sei giorni Panegirico
De Panegeristi eximij
Con fâ pompa de dottrin-na
Sorve un tema inesauribile,
Che a dî tutte l'è imposcibile
E virtù de Catterin-na!

Aoa asbriæve, ma fæ fito,
Ne-a so Gexa dall’Uspiâ,
Dunque no trovieì ciù scito,
Ne porrieì manco ciù intrâ
Per l'affluenza di divoti
Che in continua procession
Corran là appendendo voti
Pee gren grazie riçevûe
Dä so santa intercession;

Sanitæ perse riavûe.

E burasche superæ,
Paxi fæte, odj plachæ,
I affari prosperæ,
E tant’atre grazie avûe...

E co-a bocca, e o coêu se canta,
E dai grendi, e dai piccin
Inni, Lodi, e atre Orazioin
In ringraziamento ä Santa;

Osservæ un pö a squixitezza,
A sceltezza, e a splendidezza
Di apparati, e dell'artâ?...

Quanti lumni, figgi cai!
No se pêuan manco contâ,
Ghe vêu un giorno pè ammortâi!...

Miæ quell’urna che no gh’êa,
Fæta nêuva espressamente
Da-o scöpello de Peschêa
E lodâ generalmente;

Ammiæ un pö e nêuve Pittûe
De Pascian bravo pittô
Grazie ao zelo, e gren premûe
De Præ Spigno Promottô;

No s’è mai dæto l’exempio
D’aveì visto questo Tempio
Coscì ben misso e addubbôu,
O pâ un’atra Cattedrale!...

Lì da-o Clero accompagnôu
In gran cappa ghe veddieì
Pontificâ o Cardinale;

Un-na Muxica sentieì
Serrinesca stuppendiscima
Con orchestra copiosiscima
De Cantanti e de Sunnoeì
Frà Professi, e Dilettanti;

Violinisti conçertanti,
Cose diggo?... mäveggieì
Che sentieì sunnâ un Violin
Che o piggieì per Paganin;

Per sei giorni ascì ascoltieì
Sempre un nêuvo Panegirico
D’Oratori sacri celebri,
Ascendendo o primmo in pulpito.
O Cardinale Arçivescovo
Pastô nostro dilettiscimo,
Coronando o fin dell'opera
Giustignian l'eminentiscimo;

Questo è ninte; o sesto giorno,
(Do quæ ognun vorriæ campâ
Per poeì veddine o ritorno)
Vegniä a Santa trasportâ
Con gran pompa in San Lorenso

Frà i profummi dell'incenso
Dai Leviti accompagnâ,
Precedua, e seguitâ
Dai zelanti, e benemeriti
Bravi deputæ instancabili
Pè ordinâ, e per fâ eseguî
Prontamente, e degnamente
Quanto hò dito, e hò ancon da dî;

E per rende ciù imponente
Questa bella Procession,
E inspirâ ciù divozion,
Gh’andiä tutte e Religioin,
Collegiate, Confraternite,
Sacerdoti, Rettoî, Parrochi,
Opee pie, Congregazioin,
Con un numeroso seguito
De Divoti, salmezzando
E un Teddeo in Gexa cantando
In ringraziamento a Dio
Dä BENEDIZION seguio.

Doppo questo se n’andian
Cö stesso ordine, e atro gïo,
Dove l’han piggiâ a portian....
Stæ a sentî, che n’è finïo:

Andæ a miâ l’espoxision
Che se fä in quest’occaxion

De Prodûti d’ogni genere
Nazionali; suppellettili,
Sæe, velûi, panni, pizzetti,
Thûl, recammi, scioî, frexetti,
E tappëti all'uso ingleize
D’inzegnosa man zeneize;

E de tutta questa patria
Industriosa Galleria,
Se ne fä con pompa pubblica
A promissa Lotteria,
Distribuindo ao Vincitô
Con applauso generale
A onô e gloria dell’Autô
Ogni cappo nazionale;

E feliçe e fortunôu
Quello a chi ne sä toccôu
Onde o posse rammentâ
Finchè o vive nêutte e giorno
Questo avventuroso giorno
Dell’insigne Çentanâ;

Giorno grande chi fä un Epoca
E o formiä un-na bella pagina
In ti fasti da Liguria;

Giorno o quæ non terminiä,
Perchè mai nêutte vegniä

Pe o gran cæo che fä i lummetti
Da per tutto spanteghæ,
Ciasse, Stradde, Caruggietti,
Case tutte illuminæ.
Da-i Palazzi prinçipiando
Terminando ai Mezzanetti,
Torcie, luminêe, mucchetti,
Ricchi e Povei garezzando
Per distinguise, e per fâ
Onô a tanto Çentanâ;

Sciato, e Festa in ogni lêugo
Ma Portoja a piggiä fêugo!...

Non parliö de quelli tali
Ricchi Fêughi artifiziali
Che se deve ä seja fâ
(Salvo o veo per non sbagliâ)
In Bezagno, o all'Accassêua....

Tutto Zena sciortiä fêua
Per godîli, e giudicâli;
Mi no fasso che accennâli,
Ma non dubito però
Che riuscian d’un gran spettacolo
Bello, e degno a giusto titolo
De chi i fè, e chi i comandò
Per marcâ con ciù esultanza
A solenne circostanza.

Scialla dunque festezzemmo
Tutti questo Çentanâ,
Stemmo allegri, e giubbilemmo
Con spaziâse e con pregâ;

Tramandando ai nostri posteri
Un sovvegno da Funzion
Popolare, e de noî degno,
Onde possan da chi a un secolo
Immitâne con impegno,
Emulâne in profuxion,
In addobbi superâne
Ma però non surpassâne,
In preghiere, e divozion.

Voî celeste Çittadin-na,
E gloriosa Serafin-na,
No scordæ a nostra Çittæ,
Ch’a l’è a vostra, Catterin-na!...

Ma preghæ per noî, e imploræ
Do Çê a Vergine Regin-na
A degnâse d’accordâne
A so santa prottezion,
Da-e disgrazie allontanâne,
Dai castighi preservâne
E da-e pen-ne preservâne
Dell’eterna punizion!...

Imploræne da-o Segnô
So cäo Figgio, e Redentô
O perdon di falli nostri....

Sci, gran DIO, pietæ, clemenza ,
Remisscion^[sic], grazia, indulgenza,
Compasscion^[sic] di figgi vostri...

E per Santa Catterin-na
Plachæ a vostra ira divin-na,
Benedîne, prosperæne,
E da-o Chollera avvardæne.

M. P.