 |
Questa pagina a l'è stæta corretta. | |
―73―
comodiâ tûtto. (a Clot.) Voscià sciâ faççe quello che ghe diggo mi, sciä se ne vadde sciû e doman, quando vegno torna, ghe prometto de portâghe mi ûn bello tocco de majo.
Clot. Me ne rio de voscià e do so majo! vêuggio fâ quello che me pâ, e voscià sciä s’occupe d’âtro (Pip. va via parlando con Gio). E scì... o gh’intra lê! Se o no fosse vegnûo, chi sa che tanti guai no saivan successi... anzi scì! vêuggio parlà mi.... e se...
SCENA IV.
Bertomelin e detta.
Ber. (sorpreso vedendo Clot.) Clotilde! comm’a l’é? ti é chi?
Clot. Scì, son chi. Te fa mäveggia? son vegnûa pe parlâ mi a to pappà.
Ber. Pe parlâ a-o pappà? g’ho zà parlôu vëi seja, ma l’é stæto tûtto inûtile, tanto ciù doppo quello che l’é sûccesso vëi a-o dopo pranzo...
Clot. O l’ha ancon da parlâ con mi...
Ber. Ma te diggo che pe-o momento bezuêgna taxeì, lasciâ che se mette e cose in calma e aspëtâ l’occaxion.
Clot. Ma ti no sæ che se aspëtiemo ancon ciû guæi to pappà o te majä a so moddo?
