Pagina:Piaggio Poexie zeneize 1846.djvu/668

Da Wikivivàgna


Ma a gran Chêuga do Filosofo,
Ch’a l’ëa a nomme Margaitton,
Donna forte, larga e rionda,
Pettenâ[sic] co-a povee bionda,
Cöasso, troffie e medaggion,
De bon coêu, ch’a l’ëa Spezzinn-a
(Perdonæme a digrescion),
A me fè çerta meixinn-a
De porpette da boccon,
E con do so vin dell’Isora
A m’andò intonando o stêumago,
E me paivo arrecuveôu.

Ma pensando a-i caxi mæ,
A-i cäsoîn brûtti e sguarræ....
Me son torna addormentôu;

Fesci ûn sêunno maledetto,
Che son cheito zù do letto;
Deì do naso in quello vaso,
(Per fortûnn-a spixonôu),
Che m’ho averto mëzo o naso,
E ganascie streppellôu!.....

Tûtte e stelle ho visto e a lûnn-a.
Ma a l’è stæta a mæ fortûnn-a,
Perchè o sangue chi sciortî,
Quello o fù chi me guarì,
Ritornando regaggïo
Ciù che primma, e ben vestïo!....
All’Eroica, cö röbon,
Quello tale de sæa sgrezza
Cô de scorsa de limon,
C'ûnn-a corda per correzza,
Per perrûcca ûnn-a berretta
Da cacciôu, cô de viovetta,