 |
Questa pagina a no l'è stæta corretta. | |
E son tanto colorii;
Che i piggiæ pe brustolii;
Brava gente è l’equipaggio,
Comandante de coraggio,
Chêugo bon, no l'ho provôu
Perchè ho sempre regittôu;
Ma do resto, chi no gh’ëa
No se pêu formâ ûn’idea
Da brillante societæ
Che formava quella ûnion
D’ogni sesso, d’ogni etæ,
D’ogni stato, e ogni nazion,
Che (da-o fûmme, e a spûssa in fêua)
Me paiva ëse all’Accassêua;
Gh’ëa semplicitæ, eleganza,
Çercatezza, trascûranza,
Cappellassi, cappellinn-e
Baracchen, scialli, e sciallinn-e,
(Che e giacchette, e e marscinette
Han dovûo batte stacchette)
Chi ciarlava, chi cantava,
Chi a brassetto passeggiava
Per çercâ qualche fortûnn-a
A-o cæo pallido da lûnn-a.
Se sarpò, per fâ ciù fito,
Doppo d’öe do tempo dito,
Fra i evviva de personn-e,
L’impazienza de puponn-e,
E o versâ qualche buttiggia;
O che scossa che se piggia
Quando a macchina a l'è in moto!
Gh’è ûn continuo terremoto,
