 |
Questa pagina a no l'è stæta corretta. | |
Fortûnn-a, o disse, scialla!
De sprescia o se chinnò,
E tûtti duî in ta stacca
Allegro o se cacciò.
Ma indovinæ, o quattrin
A cose o l’è servïo?
A ûn poveo per limoxina
O dè pe amô de Dio;
In t’ûnn-a Festa pûbblica
L’atro de Carlevâ,
Fra balli, çenn-a, eccetera
O l’andò a terminâ.
FOA CII.
Sciortì ûn giorno d’in ta stalla
Un bell’Aze misso in galla
Con bardella, brille, fiocchi,
Gasse, ciocche, pendalocchi,
Ciûmme, strinche, frexettin,
E ûn mïon de sûnaggin!
O l’aveiva a pansa pinn-a,
Che o vegniva da pittâ
Fave, fen, faenn-a mescciâ
Co-i beschêutti da reginn-a
(Fabbrichæ da-o carubbâ).
O doveiva ëse montôu
Da-o padron ch’o l’ëa spozôu
Per portâlo a dî de scì.
