 |
Questa pagina a no l'è stæta corretta. | |
Atro che sûccao!.... ti pêu diventâ
Rûmenta manco bonn-a da ingrasciâ!
Chi troppo vêu prezûmme
E non vêu aveì nisciûn sorve de lê,
O l'è ûn ballon de fûmme
Chi parla per invidia do mestê.
Un Mocchettin aççeizo:
Perchè (o disse a ûn Lampion)
De nêutte ti me tegni
Serrôu coscì in prexon?
Quella to fascia spessa
Ecclissa o mæ splendô,
Arvime, te fö vedde,
Ghe lûxo ciù che o Sô;
O Lampion l’öbbedì,
Ma cose o ghe gnägnò? ...
Unn-a buffâ de vento
Sûbito a l’ammortò!
Figgiêu, imparæ da questo Mocchettin
Ch'eì bezêugno de guidda da piccin;
E voî, qualunque seì, che i custodî,
A tûtte e cose no ghe stæ a aderî.
