 |
Questa pagina a no l'è stæta corretta. | |
[L]arghi, che chi gh'è a veja, idest o Confalon,
Belliscima pittûa, degna d'ammirazion:
Dæ mente a quelle cappe, a-i tabarrin, a-i Fræ
Coverti in teja d'öu, se no paan tutti indoæ.
Comme van driti tutti! paan päli... belli! boä!
Se anchêu no fan figûa, e quando l'han da fâ?
Chi ven pe-a primma croxe? Son i Tenzoeì segûo,
Ma nò, che ghe rincresce de strofoggiâ o velûo;
A l'è quell'atra ricca ciammâ o Spirito Santo,
Miæ un pö che gimicchia! comm'a sta ben! che incanto!
L'è vëo, che a n'è ciù quella de l'ultima sciortia,
D'argento, e tartaruga da capp'a pê farsia:
Ma pù a l'è bella; e cappe co-i neigri tabarrin;
Miæ se no son vee cille, se no son vëi gnocchin!
Chi ven apprêuvo? caspita! da-e cappe de razon,
Recammæ tutte a sguasso, cô scorza de çetron,
Da-i tabarrin, dä croxe ben travaggiâ, da-i canti,
S'accorze, che a l'è questa de Anime Purganti;
Comme van dûi!... ma zitto, cose gh'è mai derrê,
Che veddo incomprencibile strêuppa de perrucchê?
Çezao, Belloni eccettera, tutti in tegnûa montæ?
Capiscio... devan ëse do Venardì i Pattæ.
L'è vëo per dexe! e in fæti ecco lazzù che spunta
L'atra croxe belliscima intitolâ l'Assunta.
Miæ un pö quello disegno de cappe tutto nêuvo,
Bezêugna de fissâlo lasciâghe i êuggi apprêuvo:
Farsii tutti d'argento son quelli tabarrin,
D'un velûo rosso aççeizo ciù bello, che o carmin
