 |
Questa pagina a no l'è stæta corretta. | |
Coscì o viandante stanco da-o cammin,
se pe fortûnn-a, o trêuva ûn aerbo, ûn riâ,
o s'assetta, o se pösa ûn pittinin,
pensando ä stradda ch'o l'ha ancon da fâ,
o beive ûn sorso, o manda zù ûn boccon,
e via! pe arrivâ all'ûrtima stazion.
Sto giorno, o serve pe piggiâ respïo,
e preparâse a-e lotte de doman:
trampolin da-o quae ognûn se dà l'asbrïo
pe fä a volata e pe arrivâ lontan,
che in fondo poi vêu dî, futte e prefutte,
buzzarâ tûtti e arrammassâ de mutte.
Natale, seggi sempre o benvegnûo
se ti dae pe ûn momento l'illûxion
che o mondo o vadde avanti in sciö vellûo,
che l'ommo, doppo tûtto, o segge bon,
se ti fae o miacoo che se strenze e moen
comme tra gente che san voeìse ben;
se pe ti in casa, in mëzo a-i nostri cäi
arvimmo e spalanchemmo i nostri chêu,
e cantan i figgiêu comme canäj,
e i pövei vëgi paan tornae figgiêu,
e se all'anima stanca e allûveghia
ti mandi ûn lampo ancon da tò poexìa.
151
