Pagina:Malinverni.Due.brocche.de.viovetta.1908.pdf/27

Da Wikivivàgna
Sâta a-a navegaçión Sâta a-a çèrchia


Presto, Ninnetta, ingiarmite;
no vegnî fêua co-e solite sciortìe:
andemmo! sotto a maschera
no se vedde se a bocca a cianze o a rìe:

E l'ommo sotto maschera
o lûsso o se pêu dâ de fâ ûn pö o moscio;
e nisciûn pêu conoscilo,
scibben che diggan tûtti: "te conoscio!"

Se passa l' "onorevole"
ghe daggo ûn strapuntin, ti... ûn diavolotto:
sciù dunque, Ninna, asbrivite;
e vagghe tûtto o mondo sorvesotto.

E poi? – Levando a maschera,
doman mattin, vosciûa da l'occaxion,
restiâ, Ninnetta creddilo,
doman e doppo e sempre... Pantalon!