 |
Questa pagina a no l'è stæta corretta. | |
Pantalon
Presto, Ninnetta, mettite
ûnn-a sciô in ti cavelli e quattro gasse,
o ä bell'ä mëgio ingiarmite
c'ûn domino, c'ûn meizao, con de strasse:
da Romanengo accattite
ciccolattin, marroin, diai, ciappellette
pë bocche finn-e – a-o popolo
basta e castagne secche e due vegette.
E mi, comme me maschero?...
da marcheize? da sciö? da rebellon?
o da paisan? – Tè! l'ûnica
l'é immascherâse... scì! – da Pantalon:
da Pantalon, che docile
sempre e paziente, o paga sempre e speize
(lê che co-a famme o litiga!)
de luçie che fa o sciö, che fa o marcheize.
T'hæ dito?... Mia, l'é inutile,
ah! quella mascherata mi no-a fasso....
no son ommo politico...
manco pe bûrla vêuggio fâ o paggiasso.
